کیہ تِتر کیہ مور نیں سارے
کھنباں پِچھے چور نیں سارے
ڈِھڈ کُرسی تے ناں توں ہٹ کے
دسو کاہدے شور نیں سارے
عقلاں نہیں گھاہ چرنے چھڈے
تاں تے اج وی ڈھور نیں سارے
توں ایں کھنڈ پتاسا مطلب
باقی تے فِر بھور نیں سارے
جِنے وی نیں جہڑے وی نیں
رنگ حالے کمزور نیں سارے
چڑھدیوں لے کے لہندے تیکر
کم ای ہور دے ہور نیں سارے
ودھنا ای سی کوڑ چفیرے
گُڑ جو دِتے کھور نیں سارے
سمجھ نہیں آؤندی اک دوجے دی
ٹُردے پئے کیوں ٹور نیں سارے
ناواں دے ای نیڑ نیں سندھو
اندروں چن چکور میں سارے
