کِکراں دی لُنگ کھاندیاں بکریاں کول بیٹھے
چھیڑو دیاں نظماں
نہر توں ڈنگراں نوں پانی پیا کے مُڑدے
بابے دیاں نظماں
ویڑھے چہ ٹُردی پِھردی بے بے دی سوٹی دیاں نظماں
سورج نکلن توں پہلاں
نرنے کالجے سیں لاندے
ہالی دیاں نظماں
گُنگھرواں والیاں داتریاں نال کنکاں وڈھدے
واڈھیاں دیاں نظماں
ادھی راتیں سپاں دیاں سِریاں مِدھدے
پانی وارے دیاں نظماں
فصلاں وچکار راکھی لئی بنے
چھمننے دیاں نظماں
شامیں چھیڑاں دے پرتن ویلے
کھڑکدیاں ٹلیاں دے
رینیاں دیاں نظماں
کپاہ چُگدیاں چوڑا چنکاندیاں
گوریاں بانہواں دیاں نظماں
کھوہ نوں جاندیاں ولاویں کھاندے لک تے ایدھر اودھر وجدے
پراندے دیاں نظماں
نہر دے کنڈھے مومی کاگت تے لیڑے دھوندی
رُت دیاں نظماں
پیٹھی لگی تندور چہ پکدی روٹی چوں
نِکلدی خشبو دیاں نظماں
ڈیگر ویلے پِنڈ دی گُٹھ تےبھٹھی چہ
بُجھدے دانیاں دیاں نظماں
پڑاں توں ٹوپے لے کے ہٹیاں توں کھادے
مرونڈیاں دیاں نظماں
بیراں تھلوں چُگیندے
کاٹھے بیراں دیاں نظماں
گنڈھ منگنیاں تے ونڈیندیاں گُھنگنیاں دیاں نظماں
ویاہ والے گھر پورے پِنڈ ولوں اپڑائے جان والے
دُدھ دیاں نظماں
بالاں دے تاپ سراپ ویلے مولوی ہوراں توں
دم کرائی کھنڈ دیاں نظماں
کوٹھے اُسارن ویلے
پیندی ونگار دیاں نظماں
پوہ ماگھیں دھویاں دوالے پئے مُوڑھیاں دیاں نظماں
فلاتو رنگ تے کرُنڈ پھرے
چونتر تے انیاں دیاں نظماں
گھڑونجھیاں تے پئے کوریاں گھڑیاں دے
پانی دیاں نظماں
آپو شٹاپو کھیڈدیاں کُڑیاں تے
پرالی دے انڈیاں تے بہ کے گنے چُوپدے
مُنڈیاں دیاں نظماں
تے کنیاں ہور نظماں جہڑیاں پِنڈ وچ رہ گئیاں
