تھوڑیاں ودھیریاں نیں، سَبّھے ہیرا پھیریاں نیں
نیویاں اُچیریاں نیں،سَبّھے ہیرا پھیریاں نیں
میریاں یا تیریاں نیں،تیریاں یا میریاں نیں
سَبّھے ہیرا پھیریاں نیں ،سَبّھے ہیرا پھیریاں نیں
کالکاں نوں دھوندیاں وی، چانناں دے ہوندیاں وی
راتاں جو انھیریاں نیں،سَبّھے ہیرا پھیریاں نیں
پاوندے جو رٹڑے وی، اوہناں توں ای وٹڑے وی
کھاندیاں کیوں بیریاں نیں، سَبّھے ہیرا پھیریاں نیں
اگے پچھے ڈولنا نہیں، مونہاں اُتے بولنا نہیں
کاہدیاں دِلیریاں نیں،سَبّھے ہیرا پھیریاں نیں
رُگھاں مونہیں کھاوندے نیں،سانوں جو وکھاوندے نیں
چِکڑاں تے گیریاں نیں،سَبّھے ہیرا پھیریاں نیں
سانوں ای نیِں دھوندیاں جو، ساڈے توں ای ہوندیاں جو
کاہلیاں یا دیریاں نیں،سبھے ہیرا پھیریاں نیں
شیشڑے ویکھاندیاں لئ، راہے راہے جاندیاں لئی
کھڈڑے تے ڈھیریاں نیں،سبھے ہیرا پھیریاں نیں
گِدڑاں تے چیتاں نیں، ایتھے کئی پلیتاں نیں
بھیڈاں جِویں گھیریاں نیں، سبھے ہیرا پھیریاں نیں
سندھو جو لسیریاں سی، حالے وے لسیریاں نیں
دساں کیوں لسیریاں نیں،سبھے ہیرا پھیریاں نیں
