سجن جی
سجن جی،
تُسیں ہُن کیوں آئے
ہُن تے زندگی آخری ساہ دا
بیٹھی نغمہ گائے

جِند نمانی پہلاں ہی غم
دل تے بہت ہنڈھایا
پتناں اُتے وچ اُڈیاں
رو رو چین گوایا
من دے پنچھی اج تیکر نیں
لکھاں صبر ہنڈھایا
سجن جی تسیں۔۔۔

اُس دن کس نگری سی وسدے
جس دن سی خوش حالی
جوبن دے سورج دے مُکھ سی
گِٹھ گِٹھ دی جد لالی
ہسن کھیڈن دی جد رُت سی
اُدوں نہ نین ملائے
سجن جی تُسیں۔۔۔

ہُن تے تپکا تپکاکرکے
کِر گئے نیں سبھ ہاسے
من دے چا وی سوں گئے کدھرے
ہو کے قہر نِراسے
ہُن تے جِند دے باغیں سبھ رنگ
مُرجھائے، مُرجھائے
سجن جی تُسیں۔۔۔
سجن جی

حوالہ: اُداس گلیاں دی داستان؛ صفحہ 13 ( ویکھو )