آکھن نوں تے شاعر ہور بتھیرے نیں

آکھن نوں تے شاعر ہور بتھیرے نیں
میں کاغذ تے سچے حرف اُکیرے نیں

میں لفظاں نوں اپنے غم وچ کُھنیا اے
ایہدے وچ میں دل دے اتھرو کیرے نیں

اج دی نہیں ایہہ صدیاں توں جنگ جاری اے
پر ہن ویریاں ڈاڈھے پائے گھیرے نیں

دل دیاں اکھاں نال ای رستہ لبھنا اے
سجنا! چارے پاسے گُھپ ہنیرے نیں

چنگے رہسو روک لوو جے پردیسی
ساڈے ایتھے جوگیاں والے پھیرے نیں

بِھیڑ پئی تے کوئی نیڑے لگدا نہیں
اُنج تے عارف سجن یار بتھیرے نیں

حوالہ: اتھرو آپ دلیلاں؛ صفحہ 25