ہور کوئی مجبوری اے تے رہن دیو

ہور کوئی مجبوری اے تے رہن دیو
دل دی نہیں منظوری اے تے رہن دیو

کل پرسوں آ جانا اسیں تے عادی آں
کوئی کم ضروری اے تے رہن دیو

جام نوں چھڈو، زہر وی دیسو پی لیساں
سنگت دی مزدوری اے تے رہن دیو

جام وصال دا دے کے چھڈنا چنگا نہیں
عشق دی شرط جے دُوری اے تے رہن دیو

پیلک ساڈے مونہہ تے چنگی لگدی اے
اوہدا رنگ سندوری اے تے رہن دیو

عارف جان تلّی تے لے کے پِھر دا اے
ایہہ مندی مشہوری اے تے رہن دیو

حوالہ: اتھرو آپ دلیلاں؛ صفحہ 119