اِک پل ہور ناں جیوندا، میں  دُنیا دے وچ یار

اِک پل ہور ناں جیوندا، میں دنیا دے وچ یار
جے ناں ہُندا بیلیا! دل دا ایہہ جنجال

کیہہ اوہناں دی جندری، جے سجن ہون ناں کول
لکھاں طعنے سہندیاں، جے کُھلّے چھڈّن وال

کیویں مولا بھیج سی، دوزخ دے ول پھیر
ڈھیر غماں دا ٹوکرا، ہوسی میرے نال

ڈھیر زکاتاں دے کے اوہ جنت کُنجی جان
جنت تائیں پھیلیا، ایہہ مایا دا جال

بردہ جیس حبیبؐ دا، آپے کرسی خیر
میں تے کجھ نہیں بولنا، ایہہ قبریں ہوئے سوال

عارف زردی مونہہ دی سبھ پردے دیسی کھول
ہن آپ چپیڑاں مار کے، توں مونہہ نوں کر لے لال