جھوٹھ دی خاطر ہی مر مُکّیے، ایہہ نہیں ہونا

جھوٹھ دی خاطر ہی مر مُکّیے، ایہہ نہیں ہونا
حق سچ دی گلّ کردے رُکیے، ایہہ نہیں ہونا

دشمن آن کھلوتے ساڈے بوہے اُتے
اندر وڑ کے چُھپیے لُکیے ایہہ نہیں ہونا

پیارمحبت دے داعی ہاں دنیا دے وچ
پر فرعوناں اگے جُھکیے ایہہ نہیں ہونا

کٹھیاں نہیں رہنا 'تے گھر نوں چھڈّ جانیں آں
ویہڑے دے وچ کندھاں چُکیے ایہہ نہیں ہونا

کھاندے پیندے ہون پر ہووے ذات کمینیں
ایسے گھر وچ منڈا ڈُھکیے ایہہ نہیں ہونا