اج کل اکھ پُھرکاندی ہے

اج کل اکھ پُھرکاندی ہے
کئی خبر وصال دی آندی ہے

وقت ملن دی موسم آئی
لذت روز بروز سوائی
خوشیاں کردی ماپیو جائی
کیا بردی کیا باندی ہے

درد و الم برباد تھیوسے
جنگل بیلا شاد تھیوسے
ویرانہ آباد تھیوسے
فرحت مول نہ جاندی ہے

ہر ویلے، ہر آن ہے شادی
ڈیون لوک مبارک بادی
ہر آزاروں تھئی آزادی
سُول کنوں دل واندی ہے

رانجھن جوگی آیم ویڑھے
سڑدے مردے کھیڑے بھیڑے
ہُن وت سانوں کون نکھیڑے
پل پل بانہہ سراندی ہے

تھیا فرید سہاگ سوایا
مولیٰ جھوک نوں آن وسایا
رانجھن میڈا میں گھر آیا
جیں کارن دل ماندی ہے