اساں کنوں دل چایو وے یار
جاپے کتھاں ونج لایو
یوبروچل کیچ دا والی
کیتو حال کنوں بے حالی
پربت روہ رُلایو وے یار
ملک ملیر لتونی جھوکاں
میں کلڑی وچ اویریاں لوکاں
ہک تِل ترس نہ آیووے یار
میں کملی کیا جاناں نینہہ کوں
ظلمی نہر تے قہری شینہہ کوں
آپے دید اڑایو وے یار
آپے اپنا سونہاں کیتو
کرہوں قطاریو ، نال نہ نیتو
کیں دُھوتی برمایو وے یار
یار مُٹھی کوں ڈِتڑو رولا
ساڑیو کیتو کیری کولا
تتڑی کوں کیوں تایو وے یار
آپے شہر بھنبھور ڈو آیوں
یاری لا کر چھوڑ سدھایوں
مفتا کُوڑ کمایو وے یار
یار فرید کڈاں سنبھلیسی
سہجوں سڈ کر کول بِلھیسی
جے وت بخت بھڑایو وے یار
