میں لُون پہاڑیں جمّیا
مینڈے ڈاھڈے اوکھے راہ
مینوں ککّر چھاواں ونڈیاں
مینوں وٹّے دین دُعا
میں سڑکیں کِھڑیا موتیا
میں کنکیں سُتّی بُھکھ
میں بھاگ بھری دا بالکا
مینڈے دِھیاں ورگے دُکھ
مینڈی بولی کُٹّھی حاکما
مینڈے اَڑ اَڑ ویندے وَین
مینڈی تاکی اتھرو کیر دی
مینڈے بُوہے روندے رہن
میں ہجر و ہجری ونڈیا
مینڈے ویڑھے ویڑھے گھاہ
میں وصلوں وِچھڑی چاننی
مینڈے بُھلی پَے گئے ساہ
حوالہ: سیجل، سانجھ؛ صفحہ 38 ( ویکھو )
