میرا شہر کراچی

خورے کیہڑے جرماں دا پے گیا قہر کراچی
سوہنیا ربا کر آباد میرا شہر کراچی

امن خلوصؐ تے بھائی چارہ ویکھاں ایتھے فیر
گلی محلے وچ بزاریں ہوون خوشیاں ڈھیر
کڈھدے ربا رحمت والی مُڑ کے نہر کراچی

سُکھ دا جتھوں پانی لبھے نیندر چین دی آوے
ہر ماں پُت بلاول وانگوں اپنے بال کھڈاوے
کرماں والی ایسی کوئی گھلدے لہر کراچی

چہرہ کراچی بلدا ویکھ کے سڑدا میرا سینہ
کُرسی دی ایس جنگ نے ربا مشکل کیتا جینا
سیاست داناں گُڑ وچ دِتا قوم نوں زہر کراچی

ڈاکو چور لٹیرے ایتھے لا بیٹھے نیں ڈیرے
سرپرستی ایہناں دی کردے وڈو وڈیرے
ایہو میلہ لائی رکھدے نیں اٹھو پہر کراچی

ربا اپنی رحمت والا مینہہ ورسا دے ایسا
امن خلوص تے بھائی چارہ ہو جائے پہلے جیسا
سداں محبتاں والا موسم جاوے ٹھہر کراچی

حوالہ: سدھراں مٹی ہوئیاں؛ صفحہ 121