ملکہ خاتوں بدرا خاتوں، بدھے ہتھ شتابی
منت کرکے شاہ-پری ولّ، ہوئیاں پھیر جوابی
تیری ساڈی مہر محبت، گوڑہا بھائی چارا
بہت پیارا مٹھا کڑیئے، حدوں بیشمارا
اساں شہزادے نال پکائے، پکے قول اگیرے
اﷲ بھاوے میل دیانگے، شاہ پری سنگ تیرے
ہتھ تیرے ہن لاج اساڈی، بول کریں اوہ سچے
نہیں تاں اسیں قیامت توڑی، اس ولوں ہاں کچے
اسیں بھی اِتھے شاہ ملک دے، اوہ شاہ مصر شہر دا
دوجا اس وڈیائی کیتی، جیسی کوئی نہ کردا
اس شریک بھرا سجن تھیں، کریں نہیں شرمندے
رکھ لئیں پتّ ساڈی ایتھوں، شاہ پریئے دل جِندے
