قصہ سیف الملوک

اوصاف قصّہ

میں بِھی بات عجائب ڈِٹھّی، فارسیوں اخباروں
نالے امر ہویا سِی صادر، مُرشد دے درباروں

مُلکاں تھِیں منگوا کِتاباں ،بات تمامی لوڑی
چؤہاں کِتاباں دِی تک شاہِدی ، ہِک ہِندی کر جوڑی

اِس ہِندی وِچ مطلب بہُتے، جیہا جیہا کوئی چاہے
پاوے ربّ قبُول مُحمّد ،مرداں دِی درگاہے

ہر ہر قِسم خُوشِی دِی اِس وِچ، ہر ہر قؤم غماں دِی
سُننے والے پاون ایتھوں، خواہش جِنہاں کمّاں دِی

بُہتی ہے تعِریف حُسن دِی، ہاسِی بُری شکل دِی
نالے درد وِچھوڑے بہُتے، نالے خُوشی وصل دِی

آدمیاں دے راہ طریقے، جِن پریاں دے نالے
عیش خُوشی دِے ساجے باجے، درد دُکھّاں دے چالے

بادشاہی تدبِیراں گھنیاں، دؤلت فوج مِثالے
بُخل سخاوت ظُلم عدالت، غفلت سُرت سنبھالے

جوش خروش ندِی دے بہُتے، ٹا پُو سیر جنگل دے
رُہڑنا ترنا اُڈنا ڈھینا، ذِکر ایتھے ہر گل دے

عاجِزیاں بِیکیسیاں گھنیاں ،حالت دیس بدیسوں
وِیسوں وِیس عجائب اِس وِچ ،کیا بھُورے کیا کھیسوں

کوہ قافاں دے پتے نِشانی، غاراں شہر اُجاڑاں
کلّر شور بغیچے نالے ،میوے تے پھلواڑاں

سیر شکار اتّے بند قیداں، نالے صُلح لڑائی
سوگ وِیاہ مُحمّدبخشا، ہر گل اِس وِچ آئی

رُستم دستِی حال شِکستی، دہشت بھاج دلِیری
خؤف اُمّید مُحمّدبخشا ،اِس وِچ گھنی گھنیری

بات مجازی رمز حقّانی، ون وناں دِی کاٹِھی
سفرُ العِشق کِتاب بنائی، سیف چُھپی وِچ لاٹھی

جِنھاں طلب قِصّے دِی ہوسی، سُن قِصّہ خُوش ہوسن
جِنھاں جاگ عِشق دِی سینے، جاگ سویلے روسن

شاعِر دِی آزمائش آہی، اِیس قِصّے وِچ بھائی
ہر رنگوں خُوش سُخن سُناوے ،تاں اِس دِی دانائی

خُوشیاں اندر اوہو جِیہا، واہ درداں ول دھایا
صِفت کُصِفت اندر فرماوِے ،سُخنوں سُخن سِوایا

جنگ لڑائیاں کانگاں اندر ،گج کڑک کے آوے
سفر وطن تے ماتم سوگوں، پُورے سُخن سُناوے

ہر ہر فن ہُنر وِچ ہووِے ،ماہِر تے یک فنّی
لُطف خُدائی نال عطائی، تاں اوہ ہوندا سَنّی

لُغتاں ورتن وان لیاوے، معنے وِچ عجائب
لِیکن اِنج معلُوم نہ ہوون، ہر ہر نظروں غائب

قِصّے ہور کِسے دِے اندر، درد اپنے کُجھ ہوون
بِن پِیڑاں تاثِیراں ناہیں، بِے پِیڑے کد روون

درد لگّے تاں ہائے نِکلے، کوئی کوئی رِہندا جر کے
دِلبر اپنے دِی گل کِیجے ،ہوراں نُوں مُنہ دھر کے

جِس وِچ گُجّھی رمز نہ ہووے ،درد منداں دے حالوں
بہتر چُپ مُحمّدبخشا ،سُخن اجِیہے نالوں

جو شاعِر بے پِیڑا ہووے، سُخن اوہدے بھی رُکھّے
بِے پِیڑے تِھیں شِعر نہ ہوندا، اگ بِن دُھوں نہ دُھکھّے

ویکھو وِیکھی بیت بناون، شِعروں خبر نہ پاون
ایس طرح تے صِفتاں سِٹّھاں ،بہُتے ڈُوم بناون

ردِی ردِیفوں نام نہ جانن، قافِیوں بُدھ نہ کائی
وزن برابر ٹُٹدا جُڑدا، صنعت رسم نہ بھائی

سُخن بھلا جو دردوں بھریا، بِن درداں کُجھ ناہیں
نڑاں کماداں فرق رہو دا، کیا کانِے کیا کاہیں

درد منداں دِے سُخن مُحمّد ،دین گواہی حالوں
جِس پلّےپھُل بدھّے ہوون، آوے باس رُومالوں

ہِک عِلم دِے زوروں کر دِے ،اوہ بِھی ظاہِر دِسدا
جِس پر ہوئے عطاء اِلٰہِی ،سُخن نہ چُھپدا تِس دا

دانشمند پچھان کرِیندے، عاماں سار نہ بھائی
لکّڑ ہارے لین بزاروں، جو سستِی مِٹھیائی

میں بِھی وِچّوں عیبِیں بھریا، دسّاں ہُنر زُبانوں
اکّھیں والے عِیب چھپائیو، کراں سوال تُسانُوں

بھائی دِی فرمائش منیّ، جو آیا سو کہیا
سُخن کرن دِے لائق کِتّھے، میں بِے عِلم اجِیہا

بھائی لفظ بُلایا جِتّھے، ہوگ مُخاطب بھائی
بھائی سو جو بھاء کریسی، کم وڈیاں وِڈیائی!