قصہ سیف الملوک

سیف دا والد نوں خط

اوّل صفت ثناء ربے دی، شکر الحمد لکھائیے
کرم اوہدے دی حد نہ کائی، رحمت انت نہ پائیے

دُور کرے سبھ زحمت جس دم، مہریں آوے سائیں
لاکھ مَناں دی دھوء پلیتی، پاک کرے کل جائیں

سُکےّ وہن کریندا جاری، کھیت سُہاون نہراں
گرم بزار مچاوے رونق، اُجڑیاں مُڑ شہراں

روگی بدن درست کریندا، دے انہیاّں رُشنایاں
گئے گوا تے پُت پیارے، وت ملاوے مایاں

دہ مارے سے باغ ہزاری، باراں نال سنوارے
سِکدے روح محمدبخشا، میلے یار پیارے

اے بابل توں قبلہ کعبہ، دل تے جان میری دا
دائم اسم شریف تساڈا، وِرد زبان میری دا

در تیرے دی خاک اسانوں، سُرمہ عین نورانی
تخت تیرا کوہ طور تے چہرہ، چشمہ فیض ربانی

ظِل اللہ وجود تساڈا ،چَھترمیرے سر سایہ
قدم تیرے دی دھوڑ مبارک، چاہاں تاج بنایا

سیف ملوک تیرا اک بیٹا، فرزنداں وچ نیواں
نفر غلام کمینہ بندہ ،شاہ توں صدقہ تھیواں

بے مقدار نچیزا عاجز، اوگنہار نکارا
سورج تیرے دا اک ذرہ، کردا عرض بے چارہ

قبلہ گاہ حقیقی کولوں، جاں میں رخصت ہویا
لاکھ مصیبت سختی ڈِٹھی، رج رج ہنجوں رویا

جے اوہ حال سناواں سارا، دفتر بندا بھارا
بابل دے دُکھ ہوون دونے، اگے ہی دُکھیارا

اج میرے سر رحمت وُٹھی، ٹھنڈ پئی وچ پِتےّ
نال دُعا توجہ تیری ،سبھ مطلب رب دتے

محض طفیل تساڈی میں پر، ہویا فضل حضوروں
مدد قبلہ گاہ دی کولوں، لتھے رنج رنجوروں

میں وچ کجھ نہ آہی، شیخی نہ قوّت ہشیاری
ہر آفت تھیں راکھی ہوئی، ہمت خاص تمھاری

تساں نگاہ میرے ول رکھی، دتیاں نیک دعائیں
تاں ایہ سفر عشق دے سادھے، گاہے دیو بلائیں

جس مطلب نوں تریا ہیساں، اوہ مطلب ہن پایا
ڈٹھا روپ انوپ پری دا، باغ ارم وچ آیا

شاہ شاہپال پری دے بابل، بہت محبت کیتی
ساک دھیؤ دا دینا کیتوس، نال دلے دی نیتی

عزّت بہت کرے وڈیائی، مہر گھنی حق میرے
ہتھیں چھاواں کرن بندے نوں، سب محابے تیرے

شاہ شاہپال جمال تیرے دی، رکھدا چاہ گھنیری
قدم مبارک رنجہ کرئیو، آس پُگے تد میری

نال اقبال تساڈے ہوئی، بندے دی کُڑمائی
آپ آؤ تاں کاج سوہاؤ، ڈھل نہیں مُڑکائی

جیؤں اگے احسان کمائے، میں پرتُساں زیادہ
تیویں ہور مروّت سمجھو، اِت ول کرو ارادہ

کرو معاف بے ادبی میری، رد سوال نہ ہووے
نہیں مراد تساڈا جاں جاں، پاک جمال نہ ہووے

بخشو شوخی تے گستاخی، رحمت کرم کماؤ
سار و سار نہ بہو بندے دی، ہرگز مَنوں نہ لاہو

دلبر یار میرے وس ہوسی، جدوں تساں منہ لایا
کُل مراداں حاصل ہوسن، قدم ایتھے جد پایا

آوے پیر ودھاوے اگے، درجے عین یقینوں
محرم کرے محمدبخشا، حق الخاص یقینوں

سبھ دیدار تیرے دے شوقی، جو لوکی اس پاسے
کرو غریب نوازی حضرت، توڑ چڑھاؤ آسے

باغ ارم وچ سَنے وزیراں، خود تشریف پُچاؤ
صالح ابن حمید وزیرے، نال ضرور لیاؤ

تھوڑے لفظ لکھے میں ادبوں، مت دلگیری آوے
مطلب بہت اہدے وچ جانوں، آکھ سلام مکاوے

جاں شاہپال سنی ایہ عرضی، بہت دلوں خوش ہوکے
شابش دے شاہزادے تائیں، دسدا سارے لوکے

عرضی اُتے چاڑھ لفافے، مہر جڑی شاہپالے
آہو خاطف دے ہتھ دتی، پندھ مصر ول چالے

حکم دتا شاہپال بہادر، کرو تیاری راہ ول
ٹرو وکیل اکابر وڈے ،حضرت عاصم شاہ ول

فاضل چہل حکیم سیانے، ہور پری سو چارے
دو سو نال عفریت بہادر، ڈیرہ چاون ہارے

سراندیپ نگر دا والی، نالے صاعد بھائی
نالے ہاشم قلزم والا، ایہ چلے کر دھائی

ڈیرا چا لیا عفریتاں، کیا آدم ،کیا گھوڑے
وچ ہوائے اُڈ کھلوتے، پندھ نہ کردے تھوڑے

تحفے تے سوغاتاں گھلیاں ،عجب نفیساں چیزاں
عاصم شاہ تے صالح تائیں، دیہو وانگ عزیزاں

خاص اپنے دس تھان عجائب، کپڑے قیمت والے
شاہزادے دی مائی کارن، گھلے بدیع جمالے

القصہّ اوہ ڈیرا سارا، ہویا مصر ول راہی
آہو خاطف گیا اگیرے، دیون خبر اگاہی

شاہزادے تے شاہ پری نوں، لگی آس ملن دی
گھڑیاں مِندے تے دِن گِندے ،کد شادی ہن بندی

فوج چڑھی سلطان عشق دی، ایسے بھیڑ مچائیوس
ساعت جیڈ دسے پلکارا، گھڑیوں روز بنائیوس

اِک اِک روز دسے جیوں ہفتہ، ہفتہ وانگر سالے
سال مہینے عمراں جیڈے ،کون اِچر تک جالے

سخت ایام وچھوڑے والے آ رہندے جد تھوڑے
حرص ملن دی رہے نہ ٹھلّھی، عاشق پیندے سوڑے

نیندر بھُکھ نہ رہندی موُلے، امن قرار اِک جائی
اُٹھ اُٹھ تکدے کدے نہ تھکدے، نظرراہاں پر لائی

کیہڑی گھڑی مبارک والی، جھبدے جھبدے آوے
نال سجن دے واصل ہووے، فکر ہجر دا جاوے

آ ساقی بھر دے صراحی، سُچی لال شرابوں
پی پی مست وصل دے ہوئیے، پاک فراق عذابوں

رل کے بیٹھ پیارے سارے، کرئیے مست صبوحی
خوشیاں نال محمدبخشا، مِلن مَراداں روحی