قصہ سیف الملوک

قصے دی روایت

سیف ملوک بدیع جمالے، کامل عشق کمایا
کیتا جوش طبیعت میں بی، قصہّ جوڑ سنایا

چوہاں گُٹھاں تھیں پریاں سدیاں، ہر پاسے گھل عرضی
چارے دارو واری آیاں ،جیوں جیوں لگی مرضی

معتبراں اخباراں دسن، ہر دانے پردھانے
کدھروں اکو گل سناون، کدھروں ہور نشانے

بُہتی گل لکھائی اس نے، جو سی اوّل آئی
اس دی دسی کوئی نہ چھڈی، بیتاں اندر پائی

ہوروں ہور سناون لگیاں، جیؤں جیؤں پچھوں آیاں
جے سبھ گلاں جوڑ سناواں، قصے پین خطایاں

جو جو بندی پھبدی آہی، اوہ روایت پائی
تھگڑی ٹاکی جوڑ جُٹا، کر جُلیّ راس بنائی

ایسی رفو کیتی ہر سیون، کوئی معلوم نہ کرسی
ہکو پوت دسے گا بھائی ،جے کوئی اگے دھرسی

مختلفاں جو نظری آیاں، چھڈ دتیاں کئی گلاں
ہک لِکھاں تے دوجی بھجدی، دسو کت ول چلاّں

سیف ملوکے دے ننہالے، بُہتے کہن یمن وچ
ہک راوی قحطان بتاندا ،کس دی پائیے من وچ

پہلے یار بدخشاں دسی، اوہو کاغذ لائی
اوہ بھناں ہن ہور بناواں، اس وچ کے وڈیائی

مختلفاں اس روشے گلاں، کوئی ضعیف روایت
بھجدی ناہیں قوی ضعیفوں، کیتا فکر نہایت

پریاں چار مراد کتاباں، کیوں بھُلاوا پاواں
نہیں تاں حکم میرا کد اتنا، پریاں سد بہاواں

تھوڑی بات کتاباں اندر، بہتی آپ بنائی
کیکر آپ بناوے عاجز ،سبھو دات خدائی

ظاہر دل بگلائی کارن، قصہ عشق مجازوں
اندر خانے خبراں دیسی، فقراواں دے رازوں

رمزاں نال پُرتا سارا ،چاہین سمجھن ہارے
ہمت اگے مشکل آساں، ہمت مرد نہ ہارے

اسے ہکسے مصرعے اندر ،غرض قصّے دی ساری
جو ڈھونڈے سو پاوے بھائی، مفت نہیں پر یاری