بدر مُنیر زمیں پر روشن، بی بی بدرہ خاتوں
مَلک اسمانی تَک نہ سَکدے، ڈردے عشق افاتوں
صُورت گر کوئی چَین چگل دا، اَیسے نقش نہ سَنگے
کُنڈل دار دو نَانگ دو زُلفاں، اَکھّ لَڑیاں دل ڈَنگے
جو تَکے سو سَڑسَڑ پَکے، کھڑ دی عقل داناواں
بے داغاں نوں داغ لگاوے، صبر کھڑے فَقراواں
رنگ گلابی اَنگ حسابی، چہرہ وانگ متابی
جُثے تھیں خوشبوئی ہُلے، اَکھّیں مَست شرابی
اُچیّ لمیّ نازک گوری، نرم چَنبے دی ڈالی
ناز انداز تے آن کرشمہ، صِفت خداوند والی
نَک بیشک فولادی کھناّ، ترکھّی گھوڑی اُتلی
عشق مجاز اکٹھا کر کے، سرجی سی رب پُتلی
قد سَفیدے وانگر ٹَاہنگر، بازو شاخاں بھویاں
سخت آہے پستان وٹے تھیں، مِثل نارنجاں نویاں
نال شَکر ہم تَنگ مِٹھی سی، تنگ موہِیں دی موری
گل کرے تاں خوب اَوازہ، چَھنکے مِثل کٹوری
پِستہ مَغز بادام گِری دی، لذت تری شکل سی
گرد پتاسہ مِٹھا خاصہ، رنگ دَنداسہ مل سی
سخت کماناں سَن بَھروَٹے، پیشہ زُور کمانا
پَلکاں تِیر خدنگ دِلے دا، مارن تُرت نشانہ
بَھروَٹیاں سِر آن جُھکائے، آ لگے وِچکارے
جِیونکر ہووے مقامر، اندر کعبتین قمارے
اُچاّ مَتھا بہت کشادہ، جِیونکر زیب زنانہ
دو بَھروَٹے چَن عیدیں دے، یا خَمدار کماناں
اَکھّ پَرت تَکے جِس پاسے، ظالم نَین سپاہی
چِھک کٹاراں کر دے ماراں، لُٹن پاندھی راہی
مَست اداس بیمار دیوانے، نَین متے نِندرائے
چَشماں نال کرشمہ کر کے، جادو مَنتر پائے
پَلکاں تِیر آہا نَک پتلا، خنجر سان چڑھائی
مِٹھے اوٹھ صلح وچ راضی، غَمزہ کرے لڑائی
تُھوڑا ہَسےّ تے دل کھسے، وسے وچ مَناں دے
بدرہ گوری ہَسے چوری، جیونکرشرم زناں دے
تَلخ سُخن جِس وِیلے بولے، مصری مِٹھے واتوں
عاشق تائیں چا رَلائے، شربت موت حَیاتوں
مَتھا گلہاں وانگ انگاراں، اُپر بِندی کالی
جیوں آتش پر حرمل دانہ، بد نظراں نوںٹالی
نازک جُثہ مَخمل کولوں، سِر پَیراں تک سارا
چال لَٹکدِی شکل چَمکدِی، جَوبَن بے شمارا
نازک دیہی وِچوں دِسن، ناڑیں لہو رَتیاں
دُرّیتیم وچوں جِیوں دِسن، پٹ دھاگے دیاں بتیاں
سچا صاف لہو وچ چمڑے، خوب آہا چمکِیندا
جیونکر شیشے حلبی اندر، چمک شراب مَریندا
آن ادا حُسن دیاں لہراں، شان گمان وَڈیرا
ساری صِفت بیان کرن دا، قدر نہیں کُجھ میرا
صورت بدرہ خاتوں والی، لاٹ شَمع دی آہی
صاعد ویکھ ہویا دِل بریاں، وانگ پتنگ سپاہی
پہلی جنگ خَدنگ عشق دا، لَنگھ گیا دوپاسہ
کاری سانگ پرم نے ماری، صبر نہ رہِیوس ماسہ
جادوگر دونَین کُڑی دے، پل وچ کیتا مائل
مَائل دی کے گل محمد، ہو گیا دل گھائل
