کل سفنے دے وچ مینوں،
دو نظر فرشتے آئے
اک تخت پُھلّاں دا سوہنا،
اوہ اپنے نال لیائے
اوہ اترے ہولے ہولے،
پھیر آ کے میرے کولے،
رکھ تخت پُھلّاں دا بولے،
اُٹھ تینوں ربّ بلائے

تیرے لئی سورگاں اندر،
بھوراں نے گُندے سہرے
زلفاں دے لچھے لے کے،
حوراں نے بوہکر پھیرے
پنچھی پئے منگل گاون،
پُھلّاں دے دل سدھراون،
کلیاں نوں چِھکّاں آون،
سبھ راہ تکاون تیرے

ہتھ بنھ کھلوون اوتھے،
حوراں پریاں مٹیاراں
شہداں دے چشمے وگن،
تے دُدھاں دیاں پُھہاراں
نہ اوتھے ہوکے ہاوے،
نہ بُھکھ تریہہ ستاوے،
نہ رُتّ خزاں دی آوے،
تے ہردم ریہن بہاراں

سورگاں دیاں صفتاں سن کے،
میں کیہا فرشتے تائیں،
ایسا اک سارا جیون،
میں مول پسنداں ناہیں !
جتھے نہ میل جدائیاں،
جتھے نہ صلح لڑائیاں،
نہ دھیدو تے بھرجائیاں،
میں جانا نہیں اتھائیں


جِتھے نہیں ہوت قصائی،
جِتھے نہیں چھل چھلاوے
جِتھے نہ قیدو لنگا،
وچ ٹنگ اپنی ڈاہوے،
جِتھے نہ عاشق لسّن،
جِتھے نہ روحاں کِھسّن،
جتھے نہ حوراں رُسّن،
اوہ سورگ نہ مینوں بھاوے

ہے جیون ادلا بدلی
تے ہونا رنگ برنگا
سو مردے بھگتاں کولوں،
اک جیوندا ظالم چنگا
موتی توں ہنجُو مہنگے،
لعلاں توں جگنوں سوہنے،
سورگاں توں دوزخ چنگے،
جتھے ہے جیون دنگا

میں شاعر رنگ رنگیلا،
میں پل پل رنگ وٹاواں
جے وٹدا رہاں تاں جیواں،
جے کھلاں تے مر جاواں
جھیلاں توں چنگے نالے،
جو پئے ریہن نت چالے،
تکّ روکاں کھان اچھالے،
تے ودھدے جان اگاہاں

ہے جیون دکھ ونڈاونا،
تے اگّ بگانی سڑنا
مرنے دی خاطر جینا
جینے دی خاطر مرنا
جیون ہے لڑنا کھیہنا،
جیون ہے ڈھانا ڈھہنا
جیون ہے تردے رہنا،
تے کوئی پڑاء نہ کرنا

حوالہ: کتاب: ساوے پتر