ڈیوے وانگوں بَلیاں اکھیں

ڈیوے وانگوں بَلیاں اکھیں
نیندر جھاڑ کے کھلیاں اکھیں

ویکھن ہویا شور شرابا
میرے پنڈے ٹلیاں اکھیں

کیہ لبھا ای ہوش گنوا کے
رکھیں پھرداں تلیاں اکھیں

میں کدھاں نوں لون چٹایا
میں کدھاں تے ملیاں اکھیں

اونے اپنی صورت تکنی
قاصد دے ہتھ گھلیاں اکھیں

دوروں جا کے یار منایا
پچھوں جاکے رلیاں اکھیں

ساڈا ویکھن بے رنگا اے
ساڈے ہتھوں چلیاں اکھیں

تیرے باہجوں پتھر ہے سن
توں آیوں تے ہلیاں اکھیں

ساڈے وسوں باہر چناں
تیری میری جھلیاں اکھیں

میں پیڑاں نوں ماس کھواواں
رہ گیاں نیں کلیاں اکھیں