پھلاں دے وچ پھل سجا کے دتا سی

پُھلاں دے وچ پُھل سجا کے دِتا سی
موتی سی اِک گھر بلا کے دِتا سی

کِرچی کِرچی دل نوں کرکے آیاں ایں
میں تے تینوں ٹھوک وجا کے دِتا سی

میرا کاسہ کِیویں تکے غیراں ول
میں رانجھے دا لُون چٹا کے دِتا سی

کیہ آکھاں جے تیرے جوڑے سجدا نئیں
پھل میں سارا باغ ونجا کے دِتا سی

تیرے زہراں نال اے پنڈا مردا نئیں
جگ جگ دے میں ناگ ڈنگا کے دِتا سی

ایہہ سینہ اے کافی تیری نسلاں تے
چھریاں وٹے تِیر رجا کے دِتا سی