دِیوا آس دا بَلے ہنیریاں وِچ

دِیوا آس دا بَلے ہنیریاں وِچ
نوِیں فجر دا سانوں یقین دیوے
کُجھ رحمتاں عرش دی مہربانی
کُجھ نعمتاں سانوں زمین دیوے

باس مٹی دی، رُوپ گُلاب والا
ہتھ قلم دا، مُکھ کتاب والا
مزہ شہد دا، ڈنگ عذاب والا
وِچ شوق دے نشہ شراب والا

چُپ رات نالوں مہربان جیہڑی
سخن شخر دوپہر دے نُور ورگا
مہینہ جیٹھ دا، دُھپ سیال والی
چھاں بوہڑ دی، میوہ کھجور ورگا

عقل عاشقاں، سوچ دیوانیاں دی
فکر ما پیاں، بُھل ایانیاں دی
پینڈے ندی دے ڈُونگھ سمندراں دا
سفر تھلان دے، صبر مہانیاں دا

وعدہ شیریں دے نال فرہاد والا
تانگ عشق دی بہت سرور والی
چولا یوسفؑ دا نین یعقوبؑ والے
نعرہ حق دا ضد منصور والی