جِیون سی ہِک لِیک وِچھوڑے دی

جِیون سی ہِک لِیک وِچھوڑے دی
پِچھے رہ گئ چِیک وِچھوڑے دی

پہلے ساہ تے دُوجے ساہ وِچکار
کندھ سی امبراں تِیک وِچھوڑے دی

ایہہ کیہ روز ای لیلیٰ مجنُوں دی
گل سُنا کوئی ٹھیک وِچھوڑے دی

تینوں کھادا لوڑ نِخصمی نے
مینوں پی گئ ڈِیک وِچھوڑے دی

سجّے ہتھ تے میل محبت دے
کھبےہتھ تے لِیک وِچھوڑے دی

ویکھ لیا ازما کے جگ نُوں میں
ربا دے چا بِھیک وچھوڑے دی

کیہ مرضی اے وگدے پانی دی
کنڈھے بولے لِیک وچھوڑے دی