میں تینوں اوس ویلے ویکھیا سی
جدوں اکھاں نیں پہلا ساہ لیا سی
کدیں رُکیا کدیں ساہ آ گیا سی
حیاتی نہیں کسے دی بد دعا سی
اسیں دُوجے کنارے تے ملاں گے
کسے نے رو کے مینوں آکھیا سی
بھلا تِکھی ہوا دا خوف کاہدا
بنیرے تے ہنیرا بالیا سی
میں اوہ ویلا کدوں لبھ کے لیاواں
جدوں ہتھاں چ پتھر بولیا سی
تُوں وعدہ پورا کرکے مار دِتا
تیرا لارا تے میرا آسرا سی
نصیر اودوں کنارے چِیک ماری
جدوں مینوں سمندر کھا گیا سی
