نور العین سعدیہ

آپے درد سہیڑے

آپے درد سہیڑے، بابلا
آپے درد سہیڑے!

مچ عشق دا بال کے سیکاں
رُوح دے تأ تکھیڑے
آپے درد سہیڑے، بابلا
آپے درد سہیڑے!

دل دا ماس کھوا کے کیتے
یار رگاں دے نیڑے
آپے درد سہیڑے، بابلا
آپے درد سہیڑے!

آپے اپنی سُرت ونجائی
مَلدے ہتھ لُٹیرے
آپے درد سہیڑے، بابلا
آپے درد سہیڑے!

رَت اُتھلی ساڈے کوئیاں وِچوں
بھبھلیں ہتھ لبیڑے
آپے درد سہیڑے، بابلا
آپے درد سہیڑے!

اندروں اندریں سنّھاں لگیاں
کیہنے ساک سہیڑے
آپے درد سہیڑے، بابلا
آپے درد سہیڑے!

Read this poem in: Roman  ਗੁਰਮੁਖੀ 

نور العین سعدیہ دی ہور شاعری