ਪਿਸ਼ਾਵਰ ਚਰਚ ਵਿਚ ਬੰਬ ਧਮਾਕੇ ਤੇ ਮੇਰਾ ਸੁਫ਼ਨਾ

ਉਹ ਨਿੱਕਾ ਬਾਲ
ਖ਼ੌਰੇ ਕੌਣ ਸੀ?
ਬੰਬ ਧਮਾਕੇ ਦੇ ਵਿਚ
ਮੋਈ ਮਾਂ ਨਾਲ਼ ਜੁੜਿਆ
ਭੁੱਖ ਨਾਲ਼ ਪਿਆ ਕੁਰਲਾਂਦਾ ਸੀ
ਮੋਈ ਮਾਂ ਦੀਆਂ
ਛਾਤੀਆਂ ਚੁੰਘਦਾ ਜਾਂਦਾ ਸੀ
ਮੈਂ ਇਸ ਨਿੱਕੇ ਬਾਲ ਨੂੰ
ਆਪਣੀਆਂ ਬਾਹਵਾਂ ਖੋਲ੍ਹ ਬੁਲਾਇਆ
ਕੁੱਛੜ ਚੁੱਕ ਕੇ ਸੀਨੇ ਲਾਇਆ
ਕੰਬਦੇ ਹੱਥੀਂ ਗੋਦੀ ਪਾਇਆ
ਆਪਣੇ ਛਲਣੀ ਸੀਨੇ ਉੱਤੇ
ਉਸ ਦੀ ਮਾਂ ਦਾ
ਲਹੂ ਨਾਲ਼ ਭਿੱਜਿਆ ਲਾਲ ਦੁਪੱਟਾ
ਬੁੱਕਲ ਬਣਾਇਆ
ਨਿੱਕਾ ਬਾਲ ਲੁਕਾਇਆ
ਜੀਵਨ ਉਹਦੇ ਮੂੰਹ ਨੂੰ ਲਾਇਆ
ਇਹ ਬਾਲ ਤੇਰਾ ਬਾਲ ਤੇ ਨਹੀਂ ਅੜੀਏ?
ਹਿੰਦੂ, ਸਿਖ, ਮਸੀਹ ਤੇ ਮੁਸਲਿਮ
ਸਭ ਨੇ ਸ਼ੱਕ ਦਾ ਭੇਸ ਵਟਾਇਆ
ਸੀਨਾ ਤਾਣ ਕੇ ਰੌਲਾ ਪਾਇਆ
ਮੇਰ ਤੇਰ ਦੀ ਵੰਡ ਵਿਚ ਵੰਡ ਕੇ
ਇਕ ਅਵੱਲਾ ਪਾੜਾ ਪਾਇਆ
ਲੋਕਾਈ ਦੀ ਧਰਤੀ ਉੱਤੇ
ਜੀਵਨ ਦਾ ਘੁੱਟ ਭਰ ਕੇ
ਏਸ ਨਿਕੜੇ ਬਾਲ ਨੇ
ਘੁੱਪ ਹਨੇਰ ਨਗਰੀ ਅੰਦਰ
ਮੈਨੂੰ ਆਪਣੀ ਮਾਂ ਬਣਾਇਆ
ਝੂਠੇ ਜੱਗ ਨੂੰ
ਸੱਚ ਦਾ ਸੋਹਣਾ ਰੂਪ ਵਿਖਾਇਆ