جب معشوق نین لڑاون
عاشق ترت قتل ہو جاون
مرنو رتی خوف نہ کھاون
دیکھ سولیاں ہسدے نی
بن ڈٹھیاں نین ترسدے نی
زلف پیارے والی کالی
جیوں کر ناگ لٹکدے ڈالی
دیکھ محبوباں لائی جالی
جا عاشق وچ پھسدے نی
بن ڈٹھیاں نین ترسدے نی
نینا والی بری کٹاری
اینا کٹھی خلقت ساری
جتھے دیکھن صورت پیاری
جان اتے ول نسدے نی
بن ڈٹھیاں نین ترسدے نی
جے نہ جانی مکھ دکھاوے
عاشق دی جند غوطے کھاوے
برہوں آتش جگر جلاوے
چھم چھم نین برسدے نی
بن ڈٹھیاں نین ترسدے نی
بھورے پھلاں پریت لگائی
بلبل دیندی پھرے دہائی
ہے کیوں خزاں چمن میں آئی
دل جانی دل کھسدے نی
بن ڈٹھیاں نین ترسدے نی
جے نین سے نین ملائیے
یا رب رکھے تاں مڑ آئیے
کی کچھ دل دا حال سنائیے
تیر جگر وچ دھسدے نی
بن ڈٹھیاں نین ترسدے نی
لگی جنہاں نوں جگر ہرانی
ووہی کردے جانی جانی
تڑپفن جیوں مچھلی بن پانی
ایپر بھید نہ دسدے نی
بن ڈٹھیاں نین ترسدے نی
کئی اگاں وچ جلائے
کئی سولی پکڑ جھڑائے
نیناں لکھ فقیر بنائے
جا جنگل وچ وسدے نی
بن ڈٹھیاں نین ترسدے نی
عاشق ہوئے مست دیوانے
ان کو ان بن کوئی نہ جانے
لوکی جھوٹھے مارن طعنے
ناگ جویں کر ڈسدے نی
بن ڈٹھیاں نین ترسدے نی
جنہاں پیتے پریم پیالے
سوئی مست رہن ہر حالے
دیکھ ترنگ ہوئے متوالے
جائی شمع وچ دھسدے نی
بن ڈٹھیاں نین ترسدے نی
پال سنگھ ایہہ بریاں اکھیں
مرزے جیہے جلائے ککھیں
سمبھل قدم اگیرے رکھیں
تیر قہر دے کسدے نی
بن ڈٹھیاں نین ترسدے نی
