ظالم عشق بے درد کہاوے
جس نوں لگے مار ونجاوے
باجھوں یار قرار نہ آوے
دوجی ویری خلقت ساری
عشقے اندر بہت خواری
جب چل آوے عشقَ بدن میں
آوے چین نہ چوک چمن میں
روندے پھردے عاشق بن میں
لگی جنہاں نوں پریم کٹاری
عشقے اندر بہت خواری
نہیں دیوے دلبر درشن
عاشق مکھ دیکھن نوں ترسن
بن دلبر دے آنکِھیں برسن
ساون برسے جیوں گھٹ کاری
عشقے اندر بہت خواری
زہر پیالے عشقے والے
عاشق پی ہوون متوالے
دیکھ پتنگ شمع نے جالے
مر گئے صورت دیکھ پیاری
عشقے اندر بہت خواری
جس دے دل وچّ عشقَ سماوے
اس دا عیش آرام اٹھاوے
جانی باجھ چلی جند جاوے
تن من خاک کرے اک واری
عشقے اندر بہت خواری
عشقے سسی مار گوائی
پنوں دیندا پھرے دہائی
مجنوں دے تن دبھ اگائی
موئی لیلی ویکھ وچاری
عشقے اندر بہت خواری
عشقے مرزا مار گوایا
جب صاحباں سے انگ ملایا
مہینوال فقیر بنایا
مر گئی سوہنی لا جل تاری
عشقے اندر بہت خواری
رانجھا ہیر عشقَ نے مارے
شیریں تے فرہاد وچارے
چندر بدن مانہہ یار پیارے
شاہ شمس دی کھلّ اتاری
عشقے اندر بہت خواری
منصورے نوں دار چڑھایا
حسن حسین کٹک کھپایا
بلھے تائیں عشق ستایا
زکریا چیر دیا دھر آری
عشقے اندر بہت خواری
عشقے پیر فقیر رنجانے
پھرن اجاڑیں ہوئے دیوانے
جس نوں لگی وُہی جانے
عشق رنجانی خلقت ساری
عشقے اندر بہت خواری
عشق جنہاں تن چوٹاں لائیاں
رو رو ہر دم دین دہائیاں
آ مل پیارے آ مل سائیاں
تیری صورت پر بلہاری
عشقے اندر بہت خواری
جس دے پاس نہیں دل جانی
تلخ اس دی ہے زندگانی
جیوں مچھلی تڑفے بن پانی
تیسے دلبر باجھ لاچاری
عشقے اندر بہت خواری
عشق ولی اوتار ڈلائے
بھر بھر پور ہزار ڈبائے
عشق اپائے عشق کھپائے
عشقے منے سبھ نر ناری
عشقے اندر بہت خواری
ویکھ پتنگ شمع پر سڑدے
عاشق جائ سولیاں چڑھدے
تاں بھی یار یار ہی کردے
ایس عشق دی چال نیاری
عشقے اندر بہت خواری
برہوں والے بدل کڑکن
عاشق گھائل مرغ جیوں پھڑکن
بھور پھلوں پر ہر دم لٹکن
سبھ سو مشکل کرنی یاری
عشقے اندر بہت خواری
عاشق دے دشمن ہزاراں
چاروں طرف ننگی تلواراں
پچھو جا کے عشق بیماراں
کھونّ چشم سو کر رہے زاری
عشقے اندر بہت خواری
عاشق گھائل ہوئے وچّ رن دے
رتی رت نہیں وچّ تن دے
من دی بات رہے وچّ من دے
کس نوں کہاں حقیقت ساری
عشقے اندر بہت خواری
ایس عشق دے سبھ پسارے
عشقَ اپائے عشقے مارے
عشقَ دے چوداں طبق پیارے
عشقے پر عاشق جند واری
عشقے اندر بہت خواری
وچّ قرآن لفظ اک آیا
مولٰی کنّ جدوں فرمایا
ایہہ عشقے چوداں طبق بنایا
اس عشقَ دی کھیل مداری
عشقے اندر بہت خواری
پال سنگھ ہن کی کجھ کہیئے
واحد سمجھ چپ ہو رہیئے
دل وچّ دلبر نوں مل رہیئے
جس دی قدرت بیشماری
عشقے اندر بہت خواری
