ہردم یاد رکھ کرتارا
جس بن تیرا نہیں چھٹکارا
وانگ سراؤں سمجھ جگ سارا
اک دن چھوڈ سدھاوینگا
کہو کی پلے لے جاویں گا
اب ہی سمجھ یہی ہے ویلا
جاسیں جانی باجھ اکیلا
بہر نہ ہوسی ایسا میلہ
انت بار پچھتاوینگا
کہو کی پلے لے جاویں گا
محل مکان اچی اٹاری
سوہنی صورتَ ناری پیاری
مایہ دولت بیشماری
ننگیں پیریں دھاوینگا
کہو کی پلے لے جاویں گا
جہنا سنگ پریت لگائی
انت بار نہ کوئی سہائی
جھوٹھے ساک سین ست بھائی
پھس پھس چوٹاں کھاوینگا
کہو کی پلے لے جاویں گا
جنہاں محل مکان بنائے
قال بلی نے مار گوائے
راون جیہے خاک رلائے
توں بھی بھسم سماوینگا
کہو کی پلے لے جاویں گا
جب کے موت تیرے سر آ سی
تب پھر پیش نہ کوئی جاسی
ایہہ جند کونج وانگ کرلاسی
رو رو نیر وہاوینگا
کہو کی پلے لے جاویں گا
راون سونے لنک بنائی
جاتی وار نہیں کم آئی
اک لکھ نار نہ سنگ سدھائی
توں کی ساتھ لے جاوینگا
کہو کی پلے لے جاویں گا
جنھ گھر فوجاں ہاتھی گھوڑے
چالی گنج کروں نے جوڑے
جاتی وار پڑے ہی چھوڑے
توں کی بنت بناوینگا
کہو کی پلے لے جاویں گا
جو تیرے اب میت کہاون
تینوں ہتھیں پکڑ جلاون
جالے باجھ انّ نہیں کھاون
کب دل کو سمجھاوینگا
کہو کی پلے لے جاویں گا
جے توں اپنا آپ گواویں
گلی یار دی پھیرا پاویں
جانی جانی ہر دم گاویں
توں جانی سدواوینگا
کہو کی پلے لے جاویں گا
دیکھ بیج نے آپ گوایا
بیجوں ہی پھر برچھ بنایا
پات پھول پھل لاکھوں لایا
توں ہر رنگ سماوینگا
کہو کی پلے لے جاویں گا
بھٹھّ پیا دلبر بن جینا
حرام لکھو سبھ کھانا پینا
آ توں سمجھ نہ تھیو کمینہ
سوچ سوچ سکھ پاوینگا
کہو کی پلے لے جاویں گا
پال سنگھ بس کر ہن پیارے
تیرے ہی سبھ رنگ پسارے
بگے رتے پیرے کارے
کد دل اندر آوینگا
کہو کی پلے لے جاویں گا
