مرشد مینوں سبق بھڑایا
یارو یار چوترفے چھایا
واحد ایکو ایک دکھایا
ہن کس دا جاپ جپاواں میں
کی دل دا بھیت سناواں میں
کس دی خاطر مکے جاواں
اوتھوں کس نوں ڈھونڈھ لیاواں
جیہڑی ترفے اکھ اٹھاواں
میں میں نظری آواں میں
کی دل دا بھیت سناواں میں
جب دلبر دے ہوئے نظارے
اس دا روپ ہوئے پھر سارے
اوہی دسدا طرفاں چارے
جدھر اکھ اٹھاواں میں
کی دل دا بھیت سناواں میں
جاں میں میں نے مار گوائی
خودی چھڈّ کے ملی خدائی
جیوں کر بوند سمندر سمائی
ہو فانی رب کہاواں میں
کی دل دا بھیت سناواں میں
'نہ ہنو اکبر' سن زندگانی
وچّ قرآن کلام ربانی
شاہ رگ نیڑے دلبر جانی
کیا مسجد میں جاواں میں
کی دل دا بھیت سناواں میں
پانی وگدا ہے وچّ گنگا
گیان گنگ میں نہاون چنگا
ملیا یار گئی سبھ سنگا
کیا گنگا میں نہاواں میں
کی دل دا بھیت سناواں میں
کس دی خاطر بھیکھ بناواں
جوگی ہو کس نوں دکھلاواں
ہر رنگ میں ہی میں دس آواں
کس نوں بید پڑھاواں میں
کی دل دا بھیت سناواں میں
جت ول دیکھاں دلبر جانی
لاکھ ترنگاں ایکو پانی
جیوں اک سوت ہوئی بہو تانی
کیا قدرت آکھ بتاواں میں
کی دل دا بھیت سناواں میں
سپنے کا سبھ جگت پسارا
جاگے ایکو روپ ہمارا
کدھرے سورج چند ستارہ
کدھرے راج کماواں میں
کی دل دا بھیت سناواں میں
جاں میں دیکھاں صورتَ پیاری
ویری ہوئی خلقت ساری
کدھرے نر ہے کدھرے ناری
کیا کچھ رنگ دکھاواں میں
کی دل دا بھیت سناواں میں
ہر رنگ دے وچّ ہر ہی وسے
آپے 'لا مکانی' دسے
ٹٹے غفلت والے رسے
ہن کی بھیکھ بناواں میں
کی دل دا بھیت سناواں میں
خلقت سانوں کافر کہندی
اپنے آپ دی سار نہ لیندی
لا دیکھو ہتھ پر مہندی
پچھے رنگ سہاواں میں
کی دل دا بھیت سناواں میں
گھر وچّ یار نہ ڈھونڈے کائی
تیرتھ مکے جان سدھائی
بھلی پھردی سبھ لکائی
کس کس نوں سمجھاواں میں
کی دل دا بھیت سناواں میں
سچ کہاں تاں دشمن لکھاں
دل وچّ بھید کویں کر رکھاں
اگ نہ چھپدی اندر ککھاں
کیکر عشق چھپاواں میں
کی دل دا بھیت سناواں میں
جو کوئی بھیکھ پکھنڈ بناوے
سو جگ اندر آدر پاوے
سچ کہے تے کھلّ لہاوے
ساچو ساچ الاواں میں
کی دل دا بھیت سناواں میں
شاہ رگ نیڑے دلبر وسدا
ایہہ جگ ڈھونڈھن باہر نسدا
کدھرے روندا کدھرے ہسدا
کی چھڈاں کی پاواں میں
کی دل دا بھیت سناواں میں
وہی تن میں وہی من میں
وہی بستی وہی بن میں
وہی لڑتا جا رن میں
وہی تو وہی گاواں میں
کی دل دا بھیت سناواں میں
کہیں سوہنی صورت پیاری ہے
کہیں حسن سنگاری ناری ہے
کہیں لوہا کہیں کٹاری ہے
کہیں قطرہ سندھ کہاواں میں
کی دل دا بھیت سناواں میں
کہیں بید کرانا پڑدا ہے
کہیں میں حق میں حق کردا ہے
کہیں حق کہن تھیں لڑدا ہے
کہیں حقو حق بتاواں میں
کی دل دا بھیت سناواں میں
ساچ کہوں نہیں کوئی مندا
ایپر دوجے پتہ کی من دا
مورکھ دیکھن بانا تن دا
لاکھوں روپ وٹاواں میں
کی دل دا بھیت سناواں میں
کدھرے راجے راج کماویں
کدھرے گلیاں بھیکھ منگاویں
ہم ہی لکھ لکھ روپ وٹاویں
پیر میر بن آواں میں
کی دل دا بھیت سناواں میں
کدھرے جاگیں کدھرے سوویں
کدھرے ہسیں کدھرے روویں
کدھرے انا الحق بگوویں
کھیل مدار کھلاواں میں
کی دل دا بھیت سناواں میں
آوو دیکھو شکل ہماری
جیوں کر ہے کستوری کاری
جے کوئی آوے ساچ بپاری
اس سے مل پواواں میں
کی دل دا بھیت سناواں میں
میں ہی بلھا شاہ ہو آیا
ہو منصور اناالحق حق گایا
شاہ شمس بن چمّ لہایا
ہر رنگ ہر ہو آواں میں
کی دل دا بھیت سناواں میں
سوہنے دا ہے سبھ پسارا
دھرت اکاش چند ستارہ
کدھرے چٹا کدھرے کارا
پر بے رنگ کہاواں میں
کی دل دا بھیت سناواں میں
جاگرت سپن سکھوپت کہندے
تریا چھوڈ پرھے ہو رہندے
کدھرے لا-مکانی بہندے
چھوڈ جگ سبھ جاواں میں
کی دل دا بھیت سناواں میں
سپنے اندر دلبر پایا
جاگے دوجا نظر نہ آیا
نہیں کجھ پایا نہیں گوایا
کس پر شور مچاواں میں
کی دل دا بھیت سناواں میں
پالا سنگھ ہن کی کجھ گائیے
قطرے وانگ سمند سمائیے
اس نوں مل اوہی ہو جائیے
ایک انیک سداواں میں
کی دل دا بھیت سناواں میں
