آ مل پیارے آ دیہہ درشن
اس درشن نوں اکھیاں ترسن
چھم چھم وانگ گھٹا دے برسن
رو رو چھہبر خوب لگائی
مرن بھلا ہے بری جدائی
مہر کریں پاویں اک پھیری
میں موہی ہاں صورت تیری
تدھ بن آئے غماں نے گھیری
ہے ہن جان لباں پر آئی
مرن بھلا ہے بری جدائی
کتھوں ڈھونڈھاں کدھر جاواں
کس نوں دل دا حال سناواں
ہے ہے کرکے وقت لنگھاواں
ڈاڈھا دکھ نہ کوئی دوائی
مرن بھلا ہے بری جدائی
تیرے کارن طعنے مارن
جلی بلی نوں مڑ مڑ جارن
دوتی دشمن کھل اتارن
ویری ہوئی سبھ لکائی
مرن بھلا ہے بری جدائی
تدھ بن ہوئی میں مستانی
کردی پھردی جانی جانی
لا گیوں وچّ جگر دے کانی
مڑ کے سار نہ لئیو کائی
مرن بھلا ہے بری جدائی
ہے بے دردی درد نہ آیا
خونی تیر جگر وچّ لایا
ہوش عقل جہان بھلایا
میرا درد نہ کیتو رائی
مرن بھلا ہے بری جدائی
کوئی دسے دلبر میرا
جس نے دل وچ کیتا ڈیرہ
چین نہ تس بن سنجھ سویرا
کت ول دیواں جاہِ دہائی
مرن بھلا ہے بری جدائی
اس چھلہارے کر چھل چھلیاں
روندی پھری میں وچّ گلیاں
برہوں آتش دے وچّ بلیاں
چکھا وچھوڑے پکڑ جھڑائی
مرن بھلا ہے بری جدائی
سبھ زمانہ کھیلے ہسے
میرا یار نہ کوئی دسے
اوہ ہن کیہڑیں دیسیں وسے
جس دی صورت ہوش بھلائی
مرن بھلا ہے بری جدائی
جاں سائیاں اوہ سائیں آوے
نہیں تاں جند نکل کے جاوے
جو کوئی میرا یار ملاوے
اس اتوں میں گھول گھمائی
مرن بھلا ہے بری جدائی
ہو جوگن جنگل وچّ جاواں
گل وچّ زلفاں ویس وٹاواں
جا سوہنے نوں ڈھونڈھ لیاواں
جس نے چوٹ جگر وچّ لائی
مرن بھلا ہے بری جدائی
پوئے پہر چپی ہتھ پھڑساں
ہو بیراگن بن وچّ وڑساں
برہوں آتش اندر سڑساں
جے نہ جانی دے دکھائی
مرن بھلا ہے بری جدائی
سئیو چرخے چائی اٹھاوو
گھر باہر نوں اگ لگاوو
ایکو گیت سجن دے گاوو
جس بن جھوٹھی سبھ لکائی
مرن بھلا ہے بری جدائی
کوٹھے تے چڑھ دیاں دہائیاں
آ مل پیارے آ مل سائیاں
توں میرے من کیہیاں لائیاں
کملی شکل بے ہوش بنائی
مرن بھلا ہے بری جدائی
تیرا عشق جاں تن میں آیا
ساک انگ دا سنگ چھڈایا
ویری سبھ جہان بنایا
نہ کوئی بھین نہ بابل مائی
مرن بھلا ہے بری جدائی
گھر وچّ لوک سکھی سبھ سؤندے
عاشق پھرن اجاڑیں بھؤندے
ہر دم سل جگر وچّ پؤندے
تن من والی ہوش نہ کائی
مرن بھلا ہے بری جدائی
آ مل پیارے نہ کر اڑیاں
راہ اڈیکاں ہر دم کھڑیاں
رو رو نین لگا رہے جھڑیاں
ساون جیوں کالی گھٹ آئی
مرن بھلا ہے بری جدائی
میرے دل دی میں ہی جانا
کملی آکھے سبھ زمانہ
دیوے پر جلیا پروانہ
توں توں میری جان جلائی
مرن بھلا ہے بری جدائی
لوکی مت اپنی دسن
میں پر تیر قہر دے کسن
خفتن جھلی کہہ کہہ ہسن
بے درداں نوں درد نہ رائی
مرن بھلا ہے بری جدائی
تدھ بن پیارے کس نوں بولاں
کہ تے بھید دلے دے کھولاں
ہر دم وانگ پکھے دے ڈولاں
ویکھ بیدردن سبھ لکائی
مرن بھلا ہے بری جدائی
پیکے سہرے کوڑ بہانہ
تدھ بن جھوٹھا سگل زمانہ
پڑھ کے ڈٹھا بید کرانا
تاں بھی تیری سار نہ پائی
مرن بھلا ہے بری جدائی
مہر کریں پھیری اک پاویں
اس بندی دی بند چھڈاویں
اپنیں ہتھیں مار گواویں
تاں میرے من خوف نہ رائی
مرن بھلا ہے بری جدائی
آ مل پیارے آ لگ چھاتی
تدھ بن جائے قہر دی راتی
لا کے وچّ جگر دے کاتی
مڑکے سار نہ لئیو کائی
مرن بھلا ہے بری جدائی
آ ہن آ جا دل دے اندر
تدھ بن دسن خالی مندر
تینوں بھالن شاہ قلندر
میں تیرے توں گھول گھمائی
مرن بھلا ہے بری جدائی
واہ واہ پیارے واہ واہ جانی
توں ساگر میں بوند نمانی
رہا نہ میرا نام نشانی
توں کر کر وچّ سمائی
مرن بھلا ہے بری جدائی
پال سنگھ توں آپے سوئی
جس دی طول نہ دوجا کوئی
ہن مل اس نوں اوہی ہوئی
لہر سمندر وچّ سمائی
مرن بھلا ہے بری جدائی
