انج کرنے آں

رفاقت حسین ممتاز

چلو جی انج کرنے آں

سرا دل دی کہانی دا

سرے توں موڑ لینے آں

چلو اقرار دی رنگن

ندی وچ روڑ لینے آں

چلو جی انج کرنے آں

کوئی سگنل وی نئیں دیندے

نہ کوئی کال کرنے آں

نہ کوئی پارسل تحفہ

نہ دل ارسال کرنے آں

چلو جی انج کرنے آں

ہتھاں وچ ہتھ نئیں دیندے

نہ کوئی کار کرنے آں

ذرا کو جین دی خاطر

نہ لکھاں وار مرنے آں

چلو جی انج کرنے آں

سنو جی انج کرنے آں

سرا دل دی کہانی دا

سرے توں جوڑ لینے آں

زمانہ کون ہوندا اے

سمے نوں موڑ لینے آں

سنو جی انج کرنے آں

چلو جی انج کرنے آں

دوجی لِپی وچ پڑھو

Roman    ਗੁਰਮੁਖੀ   

رفاقت حسین ممتاز دی ہور شاعری