کسے وی نہ دسیا

رفاقت حسین ممتاز

چن کولوں پچھیا

چکور کولوں پچھیا

کئی واری جاگدے

لہور کولوں پچھیا

تاریاں توں پچھیا

ساریاں توں پچھیا

کئی واری غماں دیاں

ماریاں توں پچھیا

راوی کولوں پچھیا

جھناں کولوں پچھیا

کئی واری ٹالھیاں دی

چھاں کولوں پچھیا

گوٹے کولوں پچھیا

کناری کولوں پچھیا

کئی واری کجلے دی

دھاری کولوں پچھیا

ونگاں کولوں پچھیا

ملنگاں کولوں پچھیا

کئی واری پھلاں دیاں

رنگاں کولوں پچھیا

شاہ کولوں پچھیا

ریاض کولوں پچھیا

کئی واری دل دی

بیاض کولوں پچھیا

سائیں کولوں پچھیا

اسیر کولوں پچھیا

کئی واری ارشد

میر کولوں پچھیا

دناں کولوں پچھیا

رین کولوں پچھیا

کئی واری مادھو تے

حسین کولوں پچھیا

واشنا توں پچھیا

لکھاری کولوں پچھیا

کئی واری شعراں دے

للاری کولوں پچھیا

کھاروی توں پچھیا

نبیل کولوں پچھیا

کئی واری بلھے تے

خلیل کولوں پچھیا

ہر پاسے ڈونگھے جہے

ہنیریاں دا ناں سی

لہو لہو دھپ سی تے

لیر لیر چھاں سی

پچھ دی نوں ویکھ کے تے

جگ سارا ہسیا

پتہ چن ماہی دا تے

کسے وی نہ دسیا

دوجی لِپی وچ پڑھو

Roman    ਗੁਰਮੁਖੀ   

رفاقت حسین ممتاز دی ہور شاعری