موت دی رُت کرنوئی

حالی مر کے کیہ کرنا ایں
کڑمی بھوئیں دی جھولی دے وچ
قبراں جوگی جاء ای کوئی نہیں
حالی مرن دا بھاء ای کوئی نہیں

اَجے تاں بھوئیں دی شہہ رگ وِچوں
ساہنواں دی رَت چوندی پئی اے
اَجے تاں کڑمی کُھڈے ہتھیں
سُکھ دا ساہ وی کوندھی پئی اے

اجے نیں وخت بتھیرے ایہنوں
اجے تاں ڈِھڈھ دے روگ نیں ایہندی
کُکھ نچوڑ کے پیتی جاندے
تس نپیڑ کے کھاہدی بیٹھے

بُھکھ نچوڑ کے پیتی جاندے
دھڈھ دے روگ دا دارُو لبھئیے
چُگّی روگ دا دارو لبھئیے
نہیں تے رنڈی موت دے تِھگڑے

کالیوں چِٹے ہو جاندے نیں
اتھرو بِھٹے ہو جاندے نیں
سپّاں دی ایہہ کُھڈ فسادی
جین دے روگ دا مُڈھ فسادی

موت دی رُت سہاگن کوئی نہیں
بھاگ بھری ایہہ بھاگن کوئی نہیں
ادھی موت دا کیہ کرنا ایں
مرے تے پُوری موت مراں گے

حالی مرکے کیہ کرنا ایں