شاماں پُچھیا دینہہ چڑھدا اے

شاماں پُچھیا دینہہ چڑھدا اے
فجراں دسّیا دینہہ چڑھدا اے

میرے ورگی رات جے ہووے
تیرے رنگا دینہہ چڑھدا اے

اودلی لاہمے شام کیہ ہونی
اوتھے دُوجا دینہہ چڑھدا اے

مکیوں چانن ٹُردا اے تے
کربل مُڑ جا دینہہ چڑھدا اے

لوکاں بھانے چاک اے رانجھا
میرے بھا دا دینہہ چڑھدا اے

جتھے رات ہنیرا سیکے
جھکدا جھکدا دینہہ چڑھدا اے

شکر اے اج وی میرے پنڈ اچ
تھوڑا بُہتا دینہہ چڑھدا اے

نت رنگدا اے رات للاری
نت اک سجرا دینہہ چڑھدا اے

کتھے شام سہاگن ہُندی
کتھے مڑ آ دینہہ چڑھدا اے

ویہڑا ہک تے ہکو گھر پر
وکھرا وکھرا دینہہ چڑھدا اے

رات سُویں جے رج کے ناصر
سفنے ورگا دینہہ چڑھدا اے