ساؤن دے وِلّھے چن نوں راتیں
کنھے ٹنگیائے سُکن پاروں
کلّم کلّے ویڑھے دے وچ
کلّم کلّی اوسے تار تے
جہندے اُتے اج تائیں خورے
کِنّے میل کچیلے تھگڑے
دھوپ کے سُکّن بدلے ٹنگے
مَیل نوں تُھکّن بدلے ٹنگے
تندِیں مَیل جے پئے جاوے تے
اُس کڑمی نوں کڈھن پاروں
اوہندی جَڑ نوں وڈھن پاروں
دھوپ کے اِنج ٹنگِینا پوندا اے
ہک ہک تند دا پیہنا پوندا اے
خورے کیہڑا اکلاپا جو
کلّم کلّی منجی اُتّے
کلّم کلّی ویڑھے دے وچ
یار نوں اپنے اُتے تان کے
نھیرے وچوں چانن چھان کے
راتیں دینہہ چڑھائی بیٹھا اے
چن نوں سُکنے پائی بیٹھا اے