اوہناں نے جی آیاں کہن دا، ڈھنگ مثالی رکھیا

اوہناں نے 'جی آیاں' کہن دا، ڈھنگ مثالی رکھیا
دن ویہلے وی بوہے اگے، دیوا بالی رکھیا

اپنے گھر دا بھیت کدے وی دسیا نہیں دوجے نوں،
اندروں ٹُٹے پر چہرے دا، خول سمبھالی رکھیا

چار چفیرے سارے پنڈ اجاڑے جس دے قدماں،
اوہنوں اساں ونگارکے اپنے باغ دا مالی رکھیا

دنیاں دے دو پاسڑ دندیاں، دے وچّ عمر گزاری،
اکھیاں اگے پر پھلاں دا، روپ خیالی رکھیا

لوکاں نوں ایسے دھرتی تے ہر نیامت دے دتی،
سانوں نویں جہاناں دے وعدے 'تے ٹالی رکھیا

اوہو شہر دے سبھ توں سستے، ہوٹل دے وچّ ٹکیا،
جس لئی گھر دا سبھ توں مہنگا کمرا خالی رکھیا

ڈُبیا تے نہیں رؤف کسے نے یاد وی اس نوں کیتا،
جیہڑے سورج دی رشنائی، شہر اجالی رکھیا