یاراں دے نال حادثہ، ہویا کمال دا
دوجا وی چور نکلیا، پہلے دے نال دا
اکھاں دے نال ذہن وی، ڈنگوگی روشنی،
جے جاندا تے میں کدی، دیوے نہ بالدا
بھجدے نے لوک شہر دے، ایداں اڑوتڑی،
بھجدا اے جس طرحاں کوئی، ڈریا بُھچال دا
اوہنے وی وقت دیکھ کے لہجہ وٹا لیا،
جس نوں رہیا ساں ساری حیاتی میں پالدا
لوکاں نے ایویں ذات نوں موضوع بنا لیا،
رولا سی اوہدی کار دا، بنگلے دا، مال دا
رشتے دی تیز نوک تے پل وی نہیں ٹھہریا،
جس نوں جواب مل گیا اوہدے سوال دا
اوسے نوں رؤف لا لیا سینے دے نال میں،
ملیا اے جیہڑا شخص وی، ہٹویں خیال دا
