ازلاں دے عنوان محمد

ازلاں دے عنوان محمد
رب دی نیں پہچان محمد

مسکینی دی ککھوں جمے
ویلے دے سلطان محمد

جبرائیل دی جاء نہ جتھے
پل وچ اوتھے جان محمد

عربی ڈھولا، مدنی ماہی
میری جِند تے جان محمد

دُکھیاں دے دُکھ ونڈن والے
دو جگ دی نیں آن محمد

صِفتاں وچ شمار نہ آون
عظمت دے اسمان محمد

دنیا داراں نوں دنیا دا
میرا مان تران محمد

شاہد وی کسے لیکھے آوے
بخشو جے عرفان محمد

حوالہ: گُونگیاں چیکاں؛ البرکت پبلشرز؛ صفحہ 24 ( ویکھو )