بُلھ ہلان دا فیدا کوئی نہیں

بُلھ ہلان دا فیدا کوئی نہیں
جان گنوان دا فیدا کوئی نہیں

ویلے دی سٹ جرنی پینی
اِنج کُرلان دا فیدا کوئی نہیں

گُن نہ جے کوئی پلے ہووے
بڑکاں لان دا فیدا کوئی نہیں

من تے لئی مجبوری تیری
قسماں کھان دا فیدا کوئی نہیں

پلے پے جاندی رسوائی
یاری لان دا فیدا کوئی نہیں

ہمتاں دے نال بنّے لگدی
ڈھری ڈھان دا فیدا کوئی نہیں

اس باری دی چک نہیں ہلنی
پھیری پان دا فیدا کوئی نہیں

اصلی روپ ای اصلی شے وے
بھیس وٹان دا فیدا کوئی نہیں

عجز نیاز ای کم اوندے نیں
مان تران دا فیدا کوئی نہیں

کوئی نہیں ایتھے سانجھ نبھاندا
ہتھ ودھان دا فیدا کوئی نہیں

نال نہیں شاہد روندا کوئی
دُکھ سُنان دا فیدا کوئی نہیں