دل اے تیرا گھر

دل اے تیرا گھر
آیا جایا کر

بھوئیں دی لاہ تریہ
رج کے بدلا ور

اک دن اونی ایں
موت دا کاہدا ڈر

تیریاں جریاں سو
ساڈی وی اک جر

سبھ نوں لے ڈُبے
زن، زمین تے زر

دل دی کیہڑی گل
ایہ، پاگل، خودسر

پیار چہ اوہدی جِت
جیہڑا جاوے ہر

تیرے باجھوں دس
ہووے کِنج بسر

دل دے ویڑھے نوں
دُکھاں دِتا بھر

وگدا دُکھ دریا
بھر دی رو گاگر

آویں ویلے نال
چاء نہ جاون مر

اِکو بُوہا مل
کیہ پھرنا در در

تانگھ اوہدی جیہدا
پار چنھاؤں گھر

شاہد مُکنے نہیں
دنیا دے چکر