متھے تے جد پاویں وٹ
دل دے اُتے وجدی سٹ
تیرا کیہ لہہ جانا سی
آ جاندا جے جھٹ دی جھٹ
پا کے خیر محبتاں دی
کوئی ثواب تے توں وی کھٹ
منیا ویری سن ایہ لوک
توں وی تے نہیں کیتی گھٹ
ہن دس کیہڑا سبق پڑھاں
عشق کتاب تے لئی اے رٹ
دل نوں روگ نہ لا بیٹھیں
پیڑاں جاندیاں جُسّے چٹ
اکو ڈیک اچ پی جاواں
مَدّھ بھرے نیناں دے مٹ
ویکھ کے کلّا شاہد نوں
پایا درداں نے جُھرمٹ
حوالہ: گُونگیاں چیکاں؛ البرکت پبلشرز؛ صفحہ 26 ( ویکھو )
