اُوجھر پنڈے مل ٹُرے آں
اِکّو جیہے سبھ رل ٹُرے آں
آکھن سچّی گل ٹُرے آں
فیر لہاون کھل ٹُرے آں
ساڈے سنگ جس اونا آئے
اسیں وجا کے ٹل ٹُرے آں
بھاویں صدیاں ہو گئیاں نیں
لگدا اے جیویں کل ٹُرے آں
ریت سمندر راہواں ڈکیاں
جد وی دریا وَل ٹُرے آں
ٹُر دیاں رہنا جیون ساڈا
چھالے پیریں دَل ٹُرے آں
جس مسئلے نوں حل نہیں کرنا
لبھن اوہدا حل ٹُرے آں
جیون پینڈا اوکھا، تائیوں
چھوہ کے پیار دی گل ٹُرے آں
منزل اجے نہیں لبھی شاہد
کِنے مارو تھل ٹُرے آں
حوالہ: گُونگیاں چیکاں؛ البرکت پبلشرز؛ صفحہ 29 ( ویکھو )
