خواب دے کھنڈر

صفدر ڈوگر

ایتھے چابک ویکھ سواراں دے
ایتھے ترلے ویکھ لاچاراں دے

ایتھے لمی واڑ بندوقاں دی
ایتھے پہرے نیں سرکاراں نیں

ایتھے دانش رلدی پھردی اے
ایتھے عہدے ویکھ گنواراں دے

ایتھے ماڑی قسمت پُھلاں دی
ایتھے مندے حال بہاراں دے

ایتھے بندے ککھوں ہولے نیں
ایتھے جنگل ویکھ بازاراں دے

ایتھے کاروبار ایجنٹاں دے
ایتھے ماڈل ویکھ توں کاراں دے

ایتھے جھگے چوڑ غریباں دے
ایتھے بنگلے چور چکاراں دے

ایتھے بند نیں بوہے سوچاں دے
ایتھے پھاٹک بند وچاراں دے

ایتھے یار نیں سڑ دے یاراں توں
ایتھے ویر نیں رشتے داراں دے

ایتھے کھنڈر بہت نیں خواباں دے
ایتھے ٹکڑے قول قراراں دے

ایتھے کوئی وی کسکن دیندا نہیں
ایتھے سائے نیں تلواراں نیں

Read this poem in Roman or ਗੁਰਮੁਖੀ

صفدر ڈوگر دی ہور شاعری