خواب کدے نئیں اوتر جاندے
خواب کدے نئیں کسے توں مردے
ہنجوواں دے وچ روڑھو بھاویں
فیر وی رہندے اتے ای تر دے
خواب کدے نئیں کسے توں مردے
تانگھاں نوں چمکاوندے رہندے
دکھ مصیبت ہس کے جر دے
آس کدے نئیں ٹٹن دیندے
سوہنے پاہرو چت نگر دے
خواب کدے نئیں کسے توں مردے
وڈھ دیو تے پنگر پیندے
نہ دفنایاں بعدوں ہردے
کرچی کرچی ہو کے وی ایہہ
رہندے جین دے چارے کردے
خواب کدے نئیں کسے توں مردے
ظالم دیس نکالے دیندے
بال چخہ تے مڑ مڑ دھر دے
زہر پیالے ہس کے پیندے
سولی تو نئیں جھکدے ڈردے
خواب کدے نئیں کسے توں مردے
کوڑے قید نہ پھانسی منن
لکھ زمانے ہون جبر دے
تھل دے وچ گواچے پھردے
اکھاں دے وچ ہو کے بھر دے
خواب کدے نئیں کسے توں مردے
زور آور نئیں ویکھ سکھاوندے
ٹینک بندوقاں سینے دھر دے
انھے واہ قتلاماں وچ وی
جیوندے رہندے جھر دے جھردے
خواب کدے نئیں اوتر جاندے
خواب کدے نئیں کسے توں مردے
خواب
حوالہ: مچ فقیراں؛ سانجھ؛ صفحہ 64