وی آئی پی دا مطلب کیہ اے
ہر قانون دی ایسی تیسی
روندے پھرن قانون وچارے
ہر کوئی ایتھے وی آئی پی
کوئی مالک ویکھ جاگیراں دا
کوئی گدیاں دا تفسیراں دا
کوئی صدروں ودھ وزیراں دا
ہر بندہ کسے دا بندہ اے
ہر ظالم کسے دا پُتر دھی
تے ہر کوئی ایتھے وی آئی پی
ایہہ جنے گنجے کانے نیں
ایہہ جینے کھوہ کھوہ کھانے نیں
ایہہ جنے ظلم کمانے نیں
ایہہ سارے ای جنت جانے نیں
تے کسی نئیں کرنا مندا جی
تے ایتھے ہر کوئی وی آئی پی
وڈھیاں کھا ملاوٹ کر لے
چھڑیاں پھیر خزانے بھر لے
داڑھی رکھ تے تسبی پھڑ لے
گٹیوں اچی ستھن کر لے
چابی ویکھ توں جنت دی
تے ہر کوئی ایتھے وی آئی پی
کھپ جیہناں نوں پونی آوے
اُچی گل سناونی آوے
لگی پھبی لاونی آوے
پر دی ال بناونی آوے
مارن جے انصاف دا بی
تے اوہو ای ایتھے وی آئی پی
تے ہر کوئی ایتھے وی آئی پی
حوالہ: مچ فقیراں؛ سانجھ؛ صفحہ 20