قبراں نال جے متھے ماراں فیدا کیہ

قبراں نال جے متھے ماراں فیدا کیہ
ایویں جِتّی بازی ہاراں فیدا کیہ

دل دیاں سدھراں دل اچ ڈک لے چنگا اے
رُلدی پھریں گی وچ بزاراں فیدا کیہ

بندہ بھانویں لکھ یرانے لاندا اے
کم نہ آوے جیکے یاراں فیدا کیہ

ڈر جاوے جے دل دا بال اِکلاپے توں
بہہ جاوے فِر وچ ہزاراں فیدا کیہ

بعد مرن دے سدھراں والے بلبل دے
آ جاون جے کول بہاراں فیدا کیہ

بھین بھراواں نال ای بندا سجدا اے
چھڈ جاوے جے کُونج قطاراں فیدا کیہ

اُتوں بھانویں لکھ سلاماں کردے نیں
نہ دیون جے دل وچ تھاراں فیدا کیہ

چِکّڑ دے وچ وَٹا ماراں چنگا نئیں
فِر جے لگے داگ اُتاراں فیدا کیہ

***

حوالہ: قیدی سُفنے؛ سانجھ 2010؛ صفحہ 82 ( ویکھو )