ﷲ میاں تھلے آ

ﷲ میاں تھلے آ
اپنی دنیا ویہندا جا
یا اسمانوں رزق ودھا
یا فیر کر جا مکّ مکا

تینوں دھی ویاہنی پیندی
نانکی شکّ بناؤنی پیندی
رُسّی بھین مناؤنی پیندی
لتھّ جاندے سبھ تیرے چاء
ﷲ میاں تھلے آ

دھیاں نوں توں جمنے دیندوں
کُڑماں دے توں طعنے سیہندوں
نال شریکاں کدے نہ بیہندوں
مٹی جاندی کپڑے کھا
ﷲ میاں تھلے آ

تیرے گھر نہ دانے ہُندے
پاٹے لیف پرانے ہُندے
کملے لوک سیانے ہُندے
پا دیندے تینوں گھبرا
ﷲ میاں تھلے آ

تیرا کوٹھا چوندا ریہندا
بِھجدا ریہندوں اُٹھدا بیہندا
دِسدا نہ تینوں چڑھدا لہندا
اُگّ پیندا ہر پاسے گھاہ
ﷲ میاں تھلے آ

تیری ماں تے پیو نہ ہُندا
گھر وچ آٹا گھیؤ نہ ہُندا
جو توں چاہندوں سو نہ ہُندا
ویہندا وِکدی کس کس بھا
ﷲ میاں تھلے آ

بُھکھ نَنگ مینوں جیون نہیں دیندی
نجڑی کپڑے سِیون نہیں دیندی
وہوٹی مینوں کون نہیں دیندی
گھر وچ لگّ گئی مارشل لاء
ﷲ میاں تھلے آ

ویکھ شئیے تے وہابی لڑ پئے
سُنی ڈانگاں لے کے چڑھ پئے
اِک دوجے نوں قتل کریندے
آکھن ساڈا اِک خدا
ﷲ میاں تھلے آ

سدھا سادہ ساؤُ ہُندوں
مسکیناں دا بھاؤ ہُندوں
دفتر دے وچ باؤ ہُندوں
افسر دیندے مغز کھپا
ﷲ میاں تھلے آ

ویکھ دھیاں لئی ماپے مر گئے
جان دی بازی لا کے ہر گئے
عزت دے گھر سُنجے کر گئے
کر گیا پہریدار تباہ
ﷲ میاں تھلے آ

چوری دا الزام غریبی
روندی پھرے عنایت بِیبی
پُتّ چھڈاون لئی گل خاناں
لیندا مر گیا اُبّھے ساہ
ﷲ میاں تھلے آ

تیرے گھر لئی چندہ منگدے
ڈردے لوک نہ کولوں لنگھدے
سبھ نوں گھر تے دے نہیں سکیا
اپنا گھر تے آپ بنا
ﷲ میاں تھلے آ

نیک محمّد کدھر جاوے
روٹی رزق حلال کماوے
تیرا حکم تے طیّب روزی
بن گیا اوہدے گل دا پھاہ
ﷲ میاں تھلے آ

سکّے وِیر دے بلد وِکا کے
بھین نے دھی نوں شگن لوا کے
اوہدے اُتے قرض چڑھا کے
رشتہ لیا سو فیر پرتا
ﷲ میاں تھلے آ

جابر مرد زنانی کُٹّن
بلدے چُلّھے اُتے سُٹّن
نکّ وڈھن تے گُتاں پُٹّن
مگروں لِکھتاں دین پھڑا
ﷲ میاں تھلے آ

لکھت ملے تے ملاں لیکھے
پنج شریعت پان بھلیکھے
دھی دا کون حلالہ ویکھے
اپنے جرم دی دین سزا
ﷲ میاں تھلے آ

ملاں قاضی ڈِھڈوں کھوٹے
وڈّھی کھا کھا ہو گئے موٹے
سچ آکھاں تے مارن سوٹے
مگروں دیندے فتویٰ لا
ﷲ میاں تھلے آ

ماڑے دی دِھی کڈھ نچاندے
خلق نوں اُسدا ننگ وکھاندے
گھر وچ دھی اے خوف نہ کھاندے
مول نہ کردے شرم حیا
ﷲ میاں تھلے آ

آکھن ظلم دی رسی لمّی
وچ بہشتیں جان گے کمّی
دے کے تگڑے سوچ نکمی
لٹّ لیندے ماڑے دے چاء
ﷲ میاں تھلے آ

رانجھے چاواں نال سہیڑے
ملیا دان نہ بن گئے کھیڑے
سُنجے ہو گئے وسدے ویہڑے
جاندی واری لا گئے دا
ﷲ میاں تھلے آ

بُھکھ توں ڈردی آئی بنگالن
منگدی روٹی کپڑا سالن
ویچن، رنّ بنا نہ پالن
رقماں وٹّ کے دین پھڑا
ﷲ میاں تھلے آ

شہراں وچ ہنیر نیں جَھلّے
بچیاں دے لہو فرشِیں ڈُلہے
کتھوں لیائیے کھرل تے دُلّے
ٹر پین جیہڑے متھا لا
ﷲ میاں تھلے آ

گلیاں دے وچ پھرے اداسی
پھیرا لا گئی موت دی ماسی
ڈردی خلقت بن گئی داسی
واء چلے تے نکلے تراہ
ﷲ میاں تھلے آ

دھی کمّی دی سوہنی ہووے
وہوٹی جے من موہنی ہووے
اوہدے لئی تے ہونی ہووے
تگڑے لیندے چکّ چکا
ﷲ میاں تھلے آ

دھی ماڑے دی مار سُٹی نیں
عزت لُٹّ، وچ غار سُٹی نیں
روندی تے کرلاندی رہِ گئی
کول کھلوتے رہے بھرا
ﷲ میاں تھلے آ

سولاں سال دی روپ کماری
کلو سونے نال سنگاری
جبراً چاڑھ ستی تے ماری
پنڈت لے گئے نال سواہ
ﷲ میاں تھلے آ

گینگ ریپ نے تھاں تھاں ہُندے
لاہ لیندے موئیاں دے بُندے
گھیؤ دی تھاں تے ورتن کُندے
مرچیں دیندے پھکّ ملا
ﷲ میاں تھلے آ

ہتھیں چھریاں جدھر جاندے
نکّوں کنّوں زیور لاہندے
ننگیاں لاشاں نہیں دفناؤندے
حرمت دیندے ہو ودھا
ﷲ میاں تھلے آ

ویکھ وڈیرے غدر مچاندے
دھیاں نال قرآن نکاحندے
پُتراں لئی جائداد بچاندے
دھی دا حصہ لین لُکا
ﷲ میاں تھلے آ

لُٹدے کئی دستور بنا کے
بندیاں نوں مجبور بنا کے
کپڑے روں دی حور بنا کے
اوہناں لیندے آہرے لا
ﷲ میاں تھلے آ

ویکھ اپنے نیکاں دا کارا
مال یتیماں کھا گئے سارا
اک بیوہ دا ڈھا کے ڈھارا
دِتی اک مسیت بنا
ﷲ میاں تھلے آ

اک بیوہ دا پُتر مویا
آن شریکا کٹھا ہویا
کجھ تے لگّ گیا گور کفن تے
باقی گیا شریکا کھا
ﷲ میاں تھلے آ

پنڈاں دے پنڈ خالی ہو گئے
لکھاں ہتھ سوالی ہو گئے
کاں باغاں دے مالی ہو گئے
بلبل لئی نے پنجرے پا
ﷲ میاں تھلے آ

گروپ ہتھوڑے مار کے چوٹاں
سِریاں پھیندے وانگ اخروٹاں
پھر وی درج نہ ہون رپوٹاں
ناکے توڑ کے ہون ہوا
ﷲ میاں تھلے آ

دیس دے ویہڑے ہو گئے سَوڑے
جابر پھردے ہو ہو چوڑے
پنڈت ملاں بولن کَوڑے
توں کیوں ہو گئیوں بے پرواہ
ﷲ میاں تھلے آ

دو دو ہتھیں مایہ ہُونجھی
کھا گئے پاک کتاب دی پُونجی
تاج کمپنی ہوئی نہ لُونجی
تینوں وی لا گئے نی دا
ﷲ میاں تھلے آ

ہر وستی وچ بمب دھماکے
اُڈیا گوشت تے مر گئے کاکے
دس دس من دے لگّ گئے دھاکے
بمباں دتا ماس اُڈا
ﷲ میاں تھلے آ

ویکھ کی پُتراں ظلم کمایا
ماں ملت نوں آپ ہرایا
کھا گئے نے جنت دا سایہ
چِٹے جھاٹے پائی سواہ
ﷲ میاں تھلے آ

ارباں ہتھ کرن مزدوری
چند کھاندے نے گھیؤ دی چوری
رزق حلال نہ پیندی پوری
اوکھے ہو گئے لینے ساہ
ﷲ میاں تھلے آ

ڈاکو، چوراں وچ یکجہتی
رل کے چوری کرن ڈکیتی
رقماں دسّن گھر دے بھیتی
جان محافظ اکھ چرا
ﷲ میاں تھلے آ

ہو گئے سبھ ناکام ہٹاچی
وعظاں کر کر تھکّ گئے باچی
بند نہ ہویا لہو کراچی
امناں دے جھنڈے لہرا
ﷲ میاں تھلے آ

کی پڑھدا میں سبز کتاباں
فرقہ بندی وچ نصاباں
اکلیّتاں نے وچ عذاباں
ملاں، فادر دین ہوا
ﷲ میاں تھلے آ

جو کوئی گلّ لوکائی دی کردا
فاقے دکھ ہٹائی دی کردا
جابر نال ڈھٹائی دی کردا
اوہنوں دیندے دار چڑھا
ﷲ میاں تھلے آ

کتھوں آؤن ایہہ دہشتگردے
کیہڑا مالک کس دے بردے
مارن لوکاں آپ نہ مردے
ناکے توڑ کے ہون ہوا
ﷲ میاں تھلے آ

نشے جوانی نشیوں ہر گئے
ماواں زندہ پُتر مر گئے
بھیناں دے گھر سُنجے کر گئے
جیباں دے وچ پُڑیاں پا
ﷲ میاں تھلے آ

ماڑے گھر دی عزت لُٹی
پرچہ درج نہ ہو گئی چھٹی
اتوں پولیس نے لائی جُھٹی
حبس بیجا بن گیا لاء
ﷲ میاں تھلے آ

مہنگائی نے دتا جھونا
چٹنی ہو گئی دال سلونا
چلدا کوئی نہ جادو ٹونا
من سلوے نوں پھر ورھا
ﷲ میاں تھلے آ

لاء قانون دی بالا دستی
بالادستاں لئی اے سستی
بن پیسے دے مٹ جائے ہستی
ماڑے نوں نہ ملن گواہ
ﷲ میاں تھلے آ

بش بنیا فرعون خدایا
خلق دی نپّی دھون خدایا
کھائے انسانی لَون خدایا
آ کے ساڈی دَھون چھڈا
ﷲ میاں تھلے آ

کتھوں آئے قحط طوفانی
بھکھاں مارے بال سوڈانی
لے گئے گرجھ حقوقِ انسانی
کھادے چیلاں جشن منا
ﷲ میاں تھلے آ

پُھلاں جیہے کشمیری بچے
جویں کھنڈ کھنڈ کھڈونے سچے
مارن ڈوب کے وچ چبچے
چشمیں دتا لہو رلا
ﷲ میاں تھلے آ

ہیروشیما، ناگاساکی
کچھ نہ چھڈیا بمباں باقی
ڈٹ گئے نیں پر ویکھ عراقی
لکھاں ہتھ پئے کرن دعا
ﷲ میاں تھلے آ

اک واشنگٹن دا باشندہ
اجے تیک جو نہیں شرمندہ
جاپانی نیں پھر وی زندہ
ایہدے منہ وی جندرے لا
ﷲ میاں تھلے آ

قبضہ کر لیا گینگ گروپاں
مالک وچ کھلوتے دُھپاں
سرکاراں نے وٹّ کے چُپاں
گھر گھر دِتے وین پوا
ﷲ میاں تھلے آ

منافع خور اُجاڑن جھوکاں
دیس نوں چمڑے وانگوں جوکاں
کُھلی لُٹّ نہ روکاں ٹوکاں
دولت یورپ دین پچا
ﷲ میاں تھلے آ

مُنڈیاں غیراں ہتھ پھڑائیاں
اُتوں اتّ چکی دھڑوائیاں
چھڈّ دے ہن توں بے پرواہیاں
تیجا جگّ آزاد کرا
ﷲ میاں تھلے آ

گوربے کرکے روس دے ٹوٹے
پندھ عوام دے کیتے کھوٹے
نجکاراں ہتھ دے کے سوٹے
روس چ دتی بُھکھ نچا
ﷲ میاں تھلے آ

اک دوجے تے پان لئی غلبہ
کر چھڈیا نے کابل ملبہ
بند سکول تے مر گئے طلبا
ایہناں توں اسلام بچا
ﷲ میاں تھلے آ

ملاں پنڈت دھرم لڑایا
دوواں گھر تیرا قبضایا
پنڈت مسجد ملبہ چایا
ملاں دِتے مندر ڈھا
ﷲ میاں تھلے آ

جنگ امریکی لڑ افغاناں
گھر کیتے برباد ناداناں
میرے دیش 'چ کھولھ دوکاناں
گھر گھر دِتے وین پوا
ﷲ میاں تھلے آ

ستّ ستّ سال دے کاکے مُنے
مُلّ خریدن عربی دھنے
اونٹھ دڑاؤن اتے بنّھے
مارن بچے شغل منا
ﷲ میاں تھلے آ

فیض کوئی دامن منڈیلے
جالب نے دکھ بھگتے جیہلے
لڑے جمہور لئی البیلے
لگا حق لئی سارو پھاہ
ﷲ میاں تھلے آ

ہیں توں ہر تھاں حاضر ناظر
پھر وی تگڑے فاسق فاجر
کئی کئی عمرے کرکے تاجر
کویں لیندے ٹیکس لُکا
ﷲ میاں تھلے آ

کیوں کیتے نی ماڑے پیدا
کی سی تینوں ایہدا فائدہ
نہ کوئی قُلیہ نہ کوئی قیدا
تگڑے لیندے لٹّ لٹا
ﷲ میاں تھلے آ

توں وسیں شاہ رگ توں نیڑے
کیوں نیں رنگ نسل دے جھیڑے
مذہباں کیوں انسان نکھیڑے
خوش کیوں ہُندے لہو وگا
ﷲ میاں تھلے آ

ماں مہٹر نوں در توں موڑن
مسکیناں دے دل نوں توڑن
زر دی اگّ نوں گھر وچ جوڑن
حشر دیہاڑا دین بھلا
ﷲ میاں تھلے آ

پا دے سانوں چنگے راہے
تیتھوں ہوئے جیہڑے گمراہے
لائے قفل توں رکھ نگاہے
قفل تُڑا کے راہے پا
ﷲ میاں تھلے آ

نال تیرے میں لا لئی یاری
مگروں لاہ دے بھکھ بیماری
لعنت ہے سرمائیداری
آ کے میرے نال مکا
ﷲ میاں تھلے آ

پھر وی تینوں سجدے کرناں
ازمائشاں لئی دکھڑے جرناں
مظلوماں لئی جیوناں مرناں
ظالم میتھوں ریہن خفا
ﷲ میاں تھلے آ