ਬਦਬਖ਼ਤ

ਬਦਬਖ਼ਤਾਂ ਦੀਆਂ ਕੌਣ ਸੰਭਾਲਾਂ ਕਰਦਾ ਏ
ਰੱਬ ਵੀ ਲੋਕਾਂ ਨਾਲ਼ ਕਮਾਲਾਂ ਕਰਦਾ ਏ?

ਜੇ ਧਰਤੀ ਤੇ ਆਸ਼ਿਕ ਦੀ ਕੋਈ ਲੋੜ ਨਹੀਂ
ਪੈਦਾ ਕਿਉਂ ਫਿਰ ਪਰੀ ਜਮਾਲਾਂ ਕਰਦਾ ਏ?

ਜੇ ਰੱਬ ਘੱਲੇ ਰਿਜ਼ਕ 'ਚ ਡੰਡੀ ਵੱਜਦੀ ਨਹੀਂ
ਮਿਹਨਤਕਸ਼ ਫਿਰ ਕਿਉਂ ਹੜਤਾਲਾਂ ਕਰਦਾ ਏ ?

ਜੇ ਨਹੀਂ ਚੰਗਾ ਲਗਦਾ ਮੁਖ਼ਬਰ ਘੱਲ ਘੱਲ ਕੇ
ਹਸਬ ਨਸਬ ਦੀਆਂ ਕਿਉਂ ਪੜਤਾਲਾਂ ਕਰਦਾ ਏ ?

ਤੰਗਦਸਤੀ ਦੀ ਬਾਜ਼ੀ ਜਿਤਣੀ ਸੌਖੀ ਨਹੀਂ
ਵੇਲ਼ਾ ਪੁੱਠੀਆਂ ਸਿੱਧੀਆਂ ਚਾਲਾਂ ਕਰਦਾ ਏ

ਬਾਬੂ ਮੌਤ ਸੁਨੇਹਾ ਦੇਵੇ ਝਿੜਕਾਂ ਨੇ
ਅਫ਼ਸਰ ਰੋਜ਼ ਮਾਸ਼ੂਕ ਨੂੰ ਕਾਲਾਂ ਕਰਦਾ ਏ