ਧੀਆਂ ਨੂੰ ਵਰ ਪੁੱਤਰਾਂ ਨੂੰ ਰੋਜ਼ਗਾਰ ਦਿਉ
ਵਿਹਲੇ ਫਿਰਨ ਨਾ ਸੜਕਾਂ ਤੇ ਕੰਮ ਕਾਰ ਦਿਉ
ਬੇ ਅੰਤਾ ਜ਼ਰ ਦਿੱਤਾ ਜੇ ਲੁੱਟਮਾਰ ਲਈ
ਬੇ-ਜ਼ਰ ਦਾ ਵੀ ਕਰਜ਼ਾ ਕਦੇ ਉਤਾਰ ਦਿਉ
ਫੂਕ ਕਲਾਸ਼ਨਕੋਫ਼ਾਂ ਪੀਣ ਨਾ ਨਸ਼ਿਆਂ ਨੂੰ
ਬਦਲੋ ਏਸ ਸਮਾਜ ਨੂੰ ਕਾਰ ਵਿਹਾਰ ਦਿਉ
ਅੱਗੇ ਪਿੱਛੇ ਜੇ ਨਹੀਂ ਪੁੱਛ ਯਤੀਮਾਂ ਦੀ
ਈਦ ਦੇ ਦਿਨ ਤੇ ਉਨ੍ਹਾਂ ਦੇ ਸਿਰ ਪਿਆਰ ਦਿਉ
ਭੈਣਾਂ ਦਾ ਗ਼ਮ ਵਡਿਆਂ ਕਰੇ ਨਾ ਵੀਰਾਂ ਨੂੰ
ਰਸਮਾਂ ਨੂੰ ਕਬਰਾਂ ਦੇ ਵਿਚ ਉਤਾਰ ਦਿਉ
ਯਾ ਤੇ ਮੌਤ ਨੂੰ ਰੋਕੋ ਘਰ ਘਰ ਜਾਏ ਨਾ
ਯਾ ਫ਼ਿਰ ਸਾਰੇ ਲੋਕਾਂ ਨੂੰ ਹਥਿਆਰ ਦਿਉ
ਹਰ ਵੇਲੇ ਦੁੱਖ ਦਰਦ ਜੋ ਸੋਚੇ ਲੋਕਾਂ ਦੇ
ਕਦੇ ਤੇ ਕੌਮ ਨੂੰ ਐਸਾ ਕੋਈ ਗ਼ਮਖ਼ਾਰ ਦਿਉ
ਦੁਨੀਆਂ ਉੱਤੇ ਲਹਿਰ ਜਮਹੂਰੀ ਆਈ ਏ
ਕੌਮਾਂ ਮੰਗਣ ਆਜ਼ਾਦੀ, ਕਿਉਂ ਮਾਰਦੇ ਓ?
