دھیاں نوں ور پتراں نوں روزگار دیو

دھیاں نوں ور پتراں نوں روزگار دیو
ویہلے پھرن نہ سڑکاں تے کم کار دیو

بے انتہا زر دتا جے لُٹ مار لئی
بے زر دا وی قرضہ کدے اتار دیو

پُھوک کلاشنکوفاں پین نہ نشیاں نوں
بدلو ایس سماج نوں کاروہار دیو

اگے پچھے جے نہیں پُچھ یتیماں دی
عید دے دن تے اوہناں دے سر پیار دیو

بھیناں دا غم وڈیاں کرے نہ ویراں نوں
رسماں نوں قبراں دے وچ اتار دیو

یا تے موت نوں روکو گھر گھر جائے نہ
یا فیر سارے لوکاں نوں ہتھیار دیو

ہر ویلے دکھ درد جو سوچے لوکاں دے
کدے تے قوم نوں ایسا کوئی غمخار دیو

دنیاں اُتے لہر جمہوری آئی اے
قوماں منگن آزادی، کیوں ماردے او؟

حوالہ: ﷲ میاں تھلے آ؛ صفحہ 82